Azaroaren 6an hasiko da Tipi tapa ekimena, adineko lagunak herri inguruan ibiltzera animatzeko
Dagoeneko izena eman daiteke, Gizarte Zerbitzuetan (09:00etatik 15:00etara) eta Beheko Plaza Elkartean (11:00etatik 12:00etara). Azaroaren 6an hasiko da ekimena.
Tipi tapa ekimenaren bidez, 64 urtetik gorako pertsonen ongizate fisiko eta mentala hobetzea, eta herri mailan aktibitate fisikoaren jardutea bultzatzea da helburu: ibilaldi osasuntsuak, herri zirkuitoak, taldeko ekintzak sustatuz.Herriko adineko jendeak kalera irten eta lagun artean ibiltzeko ohitura sustatu nahi dute ekimenaren bultzatzaileek.
Ekimen honen bidez, parte hartzeko interesa duten lagunen osasun fisikoan eragiteaz gain, osasun psikologikoan eta arlo sozialean eragin nahi da. Hala,azaroaren 6tik aurrera, boluntario talde batek gidatuta, asteartero goizeko 10:00etan eta arratsaldeko 15:00etan abiatuta (bi talde ezberdin) herri inguruan ibilbide ezberdinak egitea da asmoa. Hala, etxean gelditu beharrean lagun artean paseatu eta ohitura osasuntsuak hartzea bultzatu nahi da.
Ekimen honetan parte hartu nahi duten herritarrek dagoeneko eman dezakete izena Gizarte Zentroan (Hogarren) Beheko Plaza Elkartearen egoitzan astelehenetik ostiralera 11:00etatik 12:00etara bitartean, eta Gizarte Zerbitzuen Departamentuan (Brankan), astelehenetik ostiralera 08:00etatik 15:00etara. Taldea gidatzeko boluntario lana egin nahi dutenek ere bi leku horietan eman dezakete izena.
Ekimen honetako parte hartzaileak dira Zumaiako Udalaren kirol, ingurumen eta gizarte zerbitzu departamentuak, Osasun eta Kontsumo Departamentua (Urola Eskualdeko Osasun Publikoa), Zumaiako osasun zentroa. Beheko Plaza elkartea, Zumaiako Nagusilan eta Pertsona Nagusien Kontseilua.
