Datorren astean egingo dira aparkamenduaren erregulazioaren inguruko bilera irekiak
Bilera horien helburua da udan indarrean egon den sistemaren inguruko balorazioa egin eta horren inguruan herritarren esperientzia, iritzi eta proposamenak ezagutu eta jasotzea. Saio horietan erregulazio sistema herri osora zabaltzeko lehen zirriborro proposamena aurkeztuko die Udalak herritarrei eta ondoren, mahai teknikoan eta bilera irekietan jasotako ekarpenekin osatuko du dokumentua.
Zumaiako alde zaharreko aparkamenduaren erregulazioa izan da uda honetako gai nagusietako bat eta behin lehen txanpa hori amaituta, Udalak sistemaren inguruko balorazio sakona egin eta datorren urteari begira sistema herri osora zabaltzeko bide eta aukerak aztertzen hasi da dagoeneko.
Ildo horretan, iaz egin bezala, aurten ere ezinbestekotzat jo du zumaiar ororen esperientzia, iritzi eta proposamenak ezagutzea, egindako akatsak zuzendu eta 2018an ezarriko den sistemak herritar ororen beharrei erantzun diezaion.
Bilera deialdiak:
Horretarako bilera irekiak antolatu ditu datorren astean eta saio horietan herritar ororen iritzi eta ekarpenak ezagutu eta jaso ahal izateko, 5 bilera deitu ditu, 3 herritarrei zuzenduak eta beste 2 ostalari eta merkatariei zuzenduta.
Asteazkena, hilak 15:
- 09:30: herriko ostalariak
- 18:00: erregulatutako guneko bizilagunak eta inguruko auzoak (Oikia-Narrondo-Artadi)
Osteguna, hilak 16:
- 14:30: herriko merkatariak
- 18:00: Basadi-Aita Mari-P.Etxezarreta
Ostirala, hilak 17, 18:00etan:
- Alai auzategia-Estazioa-Jadarre-Puntanueta
Bilera guztiak Oxford aretoan egingo dira eta auzoka banatuta antolatu badira ere, saio guztiak irekiak izango dira, horrenbestez, herritarrek bilera batera edo bestera joateko aukera izango dute, guztietan dinamika bera jarraituko baita.
Saio guztietan, hain zuzen, lehen fasetik jasotako datuen eta lehen iritzien inguruko balorazioa aurkeztuko die Udalak zumaiarrei, baita, datorren urtera begira erregulazio sistema herri osora zabaltzeko landutako lehen zirriborro proposamena ere. Horrez gain, noski, herritarren iritzi, proposamen eta ekarpenak jasotzeko tartea egongo da eta horretarako, parte-hartze mahaiak osatuko dira gaia taldeka sakontasunean aztertu eta jorratu ahal izateko.
Bileren osteko urratsak
Behin herritarren ekarpen eta iritziak jasota, mahai teknikoan jorratuko du Udalak proposamena, eta guztien ekarpen eta iradokizunak aintzat hartuta, bigarren proposamen bat landuko du. Behin hori prest duenean, saio irekiak antolatuko ditu berriro dokumentua herritarrei aurkezteko.
