VI. Zumaia Flysch Trail mendi lasterketa uztailaren 13an jokatuko da eta azken bi edizioen ezaugarriak izango ditu: Espainiako Koparako puntuagarria izango da, bi ibilbide izango ditu –31 kilometrokoa luzea eta 15ekoa motza–, eta Espainiako autonomietako selekzioek hartuko dute parte, beste hainbat korrikalarirekin batera. Berrikuntzak, ordea, 2015ean etor daitezke. Eta ez nolanahikoak, Munduko Kopako proba izateko aukera handiak baitaude.

Zumaia Flysch Trail mendi lasterketaren seigarren aldia jokatuko da uztailaren 13an. Lasterketa dagoeneko egonkortuta dago mendi lasterketen zirkuituan, eta aurten ere Espainiako Koparako puntuagarria izango da. Ibilbideari dagokionez ere ez dago aldaketarik, eta korrikalariek bi distantzia izango dituzte aukeran: 31 kilometroko luzea eta 15 kilometroko motza. Oraindik ere zabalik dago izena emateko aukera, herrikrossa.com webgunean. Antolaketari dagokionez, kirolarien segurtasuna eta osasuna bermatzeko mediku taldea indartzeko ahalegina egin da. Orain arte lasterketan mediku bakarra izan da, baina aurten lau izango dira, hiru erizain eta lau soroslerekin batera. Bi anbulantzia egongo dira, noranahiko ibilgailu bat, eta zenbait auto ibilbidean zehar.

Parte-hartzaileen zerrendari dagokionez, gizonezkoen artean aipatzekoa da Raul Garcia Zumaian izango dela aurten. Lehen bi edizioak berak irabazi zituen eta garaipenaren lehian egon nahi du berriro. Emakumeen artean, Ana Conde eta Maite Mayora, aipa daitezke, besteak beste.

2015ean Munduko Kopa

Lehen ediziotik Zumaia Flysch Traileko antolatzaileen nahia izan da lasterketak ahalik eta maila handiena lortzea, “Zumaiaren izena zabaltzeko eta goi mailako kirol ekitaldi bat antolatzeko herrian”. Azken bi urteotan hainbat saio egin dituzte Europako Kopan sartzeko, baina zailtasun handiak aurkitu dituzte. Nazioartera zabaltzeko asmoan ez dute etsi, ordea, eta badirudi Munduko Kopan sartzeko leiho bat zabaldu dela. “ISF (International Skyrunning Federation) erakundeak kopa nagusia antolatzen du, tartean dago Zegama-Aizkorrikoa. Baina badago beste kopa bat, sei probez osatua, eta hor izan dezakegu lekua. Munduko Koparako puntuagarria da”, azaldu digu Flysch Traileko antolatzaile Bosco Garitanok.

Gaia lantzeko lan talde bat osatu da, erakunde hauekin: ISF (International Sky Running Federation), SRWS (Sky Runner Wolrd Series), SRNS (Sky Runner National Series), Ocisport, Fedme, EMF, GMF, Gipuzkoako Foru Aldundia, Zumaiako Udala eta Flysch Kirol Elkartea.

Dagoeneko harremanak nahikoa aurreratuta daude eta azken ebaluaketa baino ez da falta. Erabakia irailean jakingo da. Munduko Kopan sartzeko ibilbidea luzatu egin beharko da: “Andutzera luzatu beharko genuke, 42 kilometro inguru lortu eta lasterketa gogortzeko. Gainontzean, ibilbide berbera litzateke”. Antolatzaileen hasierako asmoa ez da Munduko Kopan urtero parte hartzea, ahalegin handia delako. “Hiru edo lau urtetik behin izango litzateke. Munduko Kopa antolatzen den urtean, gainera, orain arteko beste bi distantziak mantenduko genituzke. Hiru lasterketa izango lirateke egun berean”. Gaurko aurkezpenean izan diren erakundeen babes osoa jaso dute. Hala ere, oraindik ondo aztertzeko dauzkate Munduko Kopak antolaketan eragin ditzakeen zailtasunak, azken erabaki hartu baino lehen.

Aurtengo omenduak

Mendizaletasunarekin lotutako kirolariak omentzeko ohitura du Zumaia Flysch Trail mendi lasterketak. Aurten Alberto Zerain mendizaleak jasoko du errekonozimendua publikoaren aurrean, eta, berekin batera, hil ondorengo omenaldia egingo zaie Pako Iriondo eta Benantxio Iruretari. Alberto Zerain arabarrak ibilbide luzea du goi mendietan; besteak beste, zazpi zortzimilako igo ditu Himalaian.

Pako Iriondori dagokionez, 2011n lasterketaren omenaldia jaso zuen –Josune Bereziartu eta Rikar Otegirekin batera–, euskal mendizaletasunaren alde egindako las eskergagatik. Iriondok, gainera, harreman estua izan du Flysch Trailarekin eta asko lagundu du lasterketaren maila hobetzen eta bere izen ona zabaltzen. Iriondo otsailean hil zen, 87 urte zituela.

Eta Benantxio Iruretari dagokionez,  joan den urtean hil zen Aizarnako mendizalea, Aneton izandako istripuan. Iruretak esperientzia handian zuen goi mendietan, eta arrasto sakona utzi du bere ezagutu zuten mendizaleengan, baita belaunaldi gazteagokoengan.

Lasterketa

Ibilbidea: 31,2 kilometroko mendi lasterketa da –ibilbide motza 15,2 kilometro–, Zumaia eta Deba arteko itsaslabar ikusgarrietan.

Noiz: 2014ko uztailaren 13ean.

Kategoria: Espainiako Koparako puntuagarria.

Ekintza soziala: Bildutako dirua Aspanogi elkartearentzat izango da, minbizia duten haurrei laguntzeko.

Egitaraua:

Larunbata 12

16:00 – 20:00 Dortsal banaketa itsas kiroldegian.

18:00 Lasterketako bilera teknikoa Aita Mari aretoan.

Igandea 13

7:30 – 9:30 Dortsal banaketa itsas kiroldegian. Haurtzaindegi zerbitzuaren irekiera.

8:45 Mendi irteera gidatua, Inda Mendiren eskutik.

9:45 Omenaldia.

10:00 31,2 kilometroko probaren irteera.

10:20 15,2 km-ko probaren irteera.

12:30 15,2 km-ko probaren podiuma.

13:00 Flysch Trail (31,2 km) lasterketaren podiuma. Maila nagusia, emakumezkoena eta gizonezkoena.

13,15 FEDME podiuma (31,2 km).

13:30 Gainontzeko podiumak.

Informazio gehiago

Informazio gehiago (albisteak, araudia, mapak, argazkiak, bideoak…) aurkituko duzue www.zumaiaflyschtrail.com webgunean. Izen-ematea nola doan jarraitzeko, www.herrikrossa.com.