Elikadura burujabetza ardatz, Erkibeko herri prozesuari ekingo dio Udalak

2026/05/22

Lorategiko lanak amaitu berritan, eraikinaren inguruko parte hartze prozesua abiatu du Udalak. Elikadura burujabetza izango du oinarri, eta gai horren bueltan herritarrek izan ditzaketen kezkak nahiz ekarpenak jasotzeko galdetegi bat zabaltzearekin batera, parte hartze prozesuko hurrengo urratsen berri eman du Udalak. Ekarpenak jasotzeko hainbat saio egingo dira: herritarrei zuzendurikoa izango da lehenengoa, maiatzaren 27an, 18:00etan Oxforden.

Lorategiko lanak amaituta, Erkibe eraikineko herri prozesuari ekin dio Udalak, elikadura burujabetzarekin lotutako proiektu baten inguruan azken urteetan egindako lanketari jarraipena emateko. Helburua da orain arte landutakoa herritarrekin partekatu, ekarpen berriak jaso eta proiektuaren oinarriak modu kolektiboan eraikitzea. Horretarako, datozen hilabeteetan hainbat saio, eztabaida eta topaketa egingo dira, herriko eragileen eta herritarren ikuspegiak biltzeko. 

Farapi eta Biziola kooperatibek bideratuko dute prozesua, eta bi fase izango ditu: lehenengoan, entzute eta diagnostiko lana egingo da: galdetegi irekia zabaldu du Udalak, eta eztabaida saioak ere izango dira datozen egunetan, proiektuaren inguruko lehen iritziak eta beharrak jasotzeko eta herrian dagoen ikuspegia eta interesa ezagutzeko. Ekoizleak, merkatariak, herritarrak eta udal ordezkariak izango dira lehen hausnarketa horretan parte hartuko duten eragileetako batzuk. 

Lehen saioa, herritarrena, maiatzaren 27an izango da, 18:00etan Alondegiko Oxford aretoan, eta gaiaren inguruan interesa izan dezakeen oro gonbidatu du Udalak bertaratzera. Saioaren antolaketa errazteko, izena emateko eskatu dute: Turismo Bulegora jo, 943-14 33 96 telefono zenbakira deitu edo turismoa@zumaia.eus helbidera idatzi daiteke horretarako.

> Bete galdetegia

Udaren ondoren helduko da prozesuaren bigarren zatia: eraikuntza kolektiboaren fasea. Bertan, hainbat saio egingo dira, eta aurretik jasotako ekarpenetatik abiatuta, Erkiben kokatuko litzatekeen proiektuaren oinarriak zehazten joango dira. Lantzeko gai nagusien artean egongo dira merkatuaren helburuak eta balioak definitzea, eskaini beharreko zerbitzuak zehaztea, antolaketa eredua adostea eta etorkizuneko lan ildoak finkatzea.

Elikadura burujabetza ardatz

Lanketa hori guztia berrartu du Udalak, batik bat, orain arte egindako lanketa kaleratu eta sozializatzeko eta bide hori herritar eta eragileekin eskurik esku egiteko. Izan ere, elikadura burujabetza sustatzeko helburua aspaldidanik izan du Zumaiako Udalak. 2023an LZB arkitektura kooperatibaren laguntzarekin Erkibe bertako produktuen merkatu bilakatzeko aurreproiektua garatu zuen. Era berean, herriko eragile batzuek ere elikadura proiektu bat aurkeztu zuten, elikadura burujabetza ardatz izango zuen proiektu bat bultzatzeko beren burua aurkeztuz.

Lorategia, zabalik

Erkibe eraikineko lorategiko lanak amaitzearekin batera ekin dio Udalak herri prozesuari. Lorategia herritarrei zabaltzeko eta prozesuaren inguruko xehetasunak emateko ekitaldi irekia izango da ekainaren 3an, lorategian bertan, 18:30ean.

Izan ere, Udalak tokiko elikadura, komunitatea eta tokiko ekonomia indartzeko espazioak sustatzeaz gain, atseden hartzeko, elkartzeko, jolasteko edota ekitaldi txikiak antolatzeko topaleku berriak ere sortu nahi ditu, herritarren arteko harremanak eta auzoko dinamika biziberritzeko asmoz.

Elikadura burujabetza ardatz, Erkibeko herri prozesuari ekingo dio Udalak
Zumaiako Udala.