Gaur arratsaldean aurkeztuko dute etxebizitza turistikoak arautzeko proposamena
Udal teknikariak, etxebizitza turistikoen jabeak zein Etxebizitza Asanbladako kideak elkarrizketatu, eta araudi desberdinak aztertu ondotik, etxebizitza turistikoen gaia erregulatzeko proposamena osatu du udal gobernuak. Gaur aurkeztuko dute, 18:00etan udaletxeko pleno aretoan.
Gaur egun, Zumaiako udal araudian ez dago etxebizitza turistikoekin lotutako erregulaziorik. Beraz, orain arte ez da inolako baldintzarik zehazten herrian horrelako erabilerak dituzten jarduerak martxan jartzeko, Eusko Jaurlaritzaren araudi orokorretik aparte. Hala, jarduera hori arautu bitartean, Zumaiako Udalak moratoria ezarri zien etxebizitza turistikoei, eta urtebetez ez du erabilera horietarako baimen gehiagorik eman. Erabakia 2021eko ekaineko ohiko osoko bilkuran hartu zuen udalbatzak, udal talde politiko guztien adostasunarekin.
Udal Gobernuaren ustez, agerikoa da etxebizitza turistikoek urte osoko alokairu eskaintzan eta prezioan duten eragina. Eta egindako azterketan etxebizitza problematikarekiko dagoen arazorik handiena ez dela ondorioztatu bada ere, arautu beharreko arloa dela uste du. Horretaz gain, ordea, atari berdineko bizilagunen bizikidetzan zein Zumaiako ingurunean eragina duen jarduera izanik, beharrezkotzat jotzen du erregulatu eta zenbait baldintza jartzea.
Hori horrela, beste zenbait Udalek daukaten moduan, Zumaiak ere erabilera hori erregulatzeko prozesua jarri zuen martxan iaz. Hala, Hiritik At kooperatibaren laguntzarekin, udal teknikariak eta inplikatutako parte ezberdinak entzunda, Zumaiarentzat egokiena den araudi propioa osatzeko lanean murgilduta egon da udal gobernua azken hilabeteotan. Proposamena osatuta, jendaurrean aurkeztuko du hilaren 18an, 18:00etan udaletxeko pleno aretoan.
Etxebizitza arazoari “modu integralean” erantzuteko lanean
Udal Gobernuaren lehentasunetako bat da etxebizitza arazoari erantzutea. Jakitun da etxebizitza turistikoak arazoaren zati bat besterik ez direla, eta, horregatik, jarduera hori arautzeaz gain, bestelako lan-lerroak martxan jartzea beharrezkoa dela uste du.
Horrenbestez, etxebizitza arazoari irtenbidea emateko programa bat osatua du udal gobernuak. Etxebizitza bulegoa martxan jartzeko lanean ari da, eta horretarako, etxebizitza bulegoan arituko den teknikari bat kontratatu zuen iaz. Alokairurako laguntzak ematea, eta etxe hutsak mobilizatzeko lanketa abiatzea dira lerro nagusiak. Gainera, etorkizunean etor daitezkeen etxebizitza promozio berrietan etxebizitza behar desberdinak kontutan hartzeko lanean ari da udal gobernua.
