Hasi dira Marianton parkea eraberritzeko lanak

Marianton parkea eraberritzeko obrak martxan dira dagoeneko. Zumaiako Udalak sustatutako proiektuaren bidez, herriguneko berdegune estrategikoenetako bat erabat berrituko da, haur, gazte eta helduentzako erabilera anitzeko espazio moderno eta jasangarri bihurtzeko. Parkeak 5.321,7 metro koadroko azalera du, eta horietatik 726,6 metro koadro daude gaur egun jolasgune eta kalistenia eremuetara bideratuta. Obrak Excavaciones y Transportes Orsa, S.L. enpresak egingo ditu, eta BEZa barne, 1.036.861,27 euroko aurrekontua izango dute lanek. Ondo bidean, martxoan zabalduko da parke eraberritua.

Marianton parkeak kokapen estrategikoa du, eta Gernika parkearekin batera, herriguneko berdegune zabal nagusietako bat da. Eraberritzearekin, lehendik dauden zuhaitzak ahal den neurrian mantenduko dira, lurzoru iragazgarriak sortuko dira uraren zikloa errespetatzeko, eta elementu naturalak lehenetsiko dira bai jolasguneetan bai egonlekuetan. Lanak egiteko zuhaitz batzuk kendu beharko badituzte ere, askotariko espezietako 48 zuhaitz eta zuhaixka berri landatuko dituzte gero. 

Parkeak haurrei zuzendutako jolas eremu naturalak izango ditu ardatz, baina belaunaldi guztiei zuzendutako espazio publikoa ere izango da. Besteak beste, honako gune hauek aurreikusten dira:

• Jolas naturalen eremua.
• Parke estalia.
• Piknik mahaiak.
• Belardi zabala.
• Euri-lorategia.
• Oinezkoentzako eta bizikletentzako bideak.
• Atseden eta egoteko guneak.

Haurrek landutako proiektua

Proiektuaren berezitasunetako bat da diseinua Zumaiako Haurren Kontseiluarekin landu izana. Haurren ekarpenak oinarri hartuta diseinatu da jolas eremua, haien behar eta nahietara egokitutako espazio erakargarri eta irisgarria sortzeko. Ondoren, Udalak Kimu Bat enpresari esleitu zion proiektuaren idazketa, eta orain Excavaciones y Transportes Orsa, S.L. enpresak gauzatuko du obra.

Marianton parkearen berritzea Udalak herriko haur parke guztiak datozen urteetan eraberritzeko abiatu duen planaren barruan kokatzen da, herritarren aisialdirako eta bizikidetzarako kalitatezko espazio gehiago sortzeko helburuarekin.