Herritarrek hitza, Herri Eskola ondoan estalpea egitearen proiektuaren inguruan

Herri Eskolako frontoiaren ondoan estalpea egiteko proiektuaren inguruan herritarrek hitza hartuko dute azaroaren 17tik 23ra bitartean. Estalpe hori egiteko aukera ikusirik, proiektu desberdinak ditu eskuartean Udalak, baina horrelako inbertsioa egin aurretik, herritarren iritzia ematea nahi da; herritarren beharretara egokitutako inbertsioak egin nahi baitira.

Proiektu horren inguruan 16 urtetik gorako zumaiarrek bozka bidez beren iritzia emateko aukera dute, Alondegiko sarreran. Botoa emateko beharrezko izango da NAN-a erakutsi eta zenbakia ematea. Horrela, herritar bakoitzak bozka bakarra ematea bermatu nahi da.

Estalpeak gehienbat kirol ekintzetarako balioko du, baina bestelako ekintzak egiteko aukera ere eskaini dezake. Udalak eskatutako proiektuen arabera, 400.000 euroko aurrekontua izango du, eta kopuru hori kontuan izanda hiru proiektu ditu eskuartean. 

Iritzia ematen dutenek, bi galdera izango dituzte boto papelean. Alde batetik, estalpea egitea nahi al duten, hau da, herrian beharrezkoa ote den. Eta bestetik, egin behar bada, zein proiektu duten gustukoena.

Hiru proeiktu

1. KAXA: Hormigoizko zutabe anitzek KAXA txuria sostengatzen dute. KAXA txapa perforatuarekin ixten da, eta txapazko panelen perforazio desberdinek itxura "jostagarria" ematen diote. Kaxaren ertzak, babes beharraren arabera gora edo behera mugitzen dira, (pixta babestuagoa geratzen da  Iparralderantz) fatxadaren itxituraren altuerarekin jokatzen da. Estalkia egitura metaliko espazial baten gainean jarriko da.

2. SAIHETSAK: Egurrezko egitura bistan da, agerian geratzen da.  Estalkia egurrezko 9 saihets haundik sostengatzen dute. Saihets arteko fatxadak txapa perforatuarekin ixten dira.

3. AZALA: Hormigoizko lau zutabek U formako txapazko estalki gorria sostengatzen dute. U-a txapazko azal kontinuo bat da, teilatua eta fatxada osatzen dituena. Estalkia egitura metaliko espazial baten gainean izango da. Iparraldeko eta hegoaldeko fatxadak ez dute itxiturarik, pista irekiagoa geratuko litzateke.

Bozkatzeko eskubidea

Estalpearen proiektuaren inguruko iritzia jasotzeko, proiektuak azaroaren 17tik 23ra bitartean ikusgai izango dira, eta bertan eman ahal izango dute botoa 16 urtetik gorako zumaiarrek. Hala ere, proiektuak kiroldegian ere izango dira ikusgai. Botoa emateko eskubidea zumaiar orok izango du, eta pertsonako boto bakarra emateko aukera izango da. Bozkatzeko aukera Alondegiko sarreran izango da.

Astegunetan 17:00etatik 20:00etara izango da bozkatzeko ordutegia, eta asteburutan, goizetan 12:00etatik 14:00etara eta arratsaldean 18:00etatik 20:00etara.