Martxan da Mintzalagun programa

2018/11/11

22 talde osatu dira; 82 pertsona ari dira astero elkartzen euskara praktikatzeko. Ikasturte hasierako ekitaldia Zumaian izango da, Alondegian, azaroaren 15ean, 18:30ean: “Bakean dagoenari bakean utzi” antzerkia

Ekin diogu ikasturte berriari eta abian da 2018-19 ikasturteko Mintzalagun Programa: astean behin hitzordua bidelari eta bidelagunek, euskaraz aritzeko. Ikasturte honetako leloa da “Praktikatu eta bizi”, euskaraz egin eta euskaraz bizi.

22 talde, 82 mintzalagun

Urrian zehar izena eman eta taldeak osatuta, martxan dira asteroko hitzorduak. 22 talde osatu dira (Zumaian 4, Orion 3 eta Zarautzen 15) eta, guztira, 82 pertsona ari dira euskara praktikatzen.

Hasierako ekitaldia Zumaian

Ohi bezala, taldeak osatu ondoren, hasierako ekitaldia egingo dugu. Oraingoan Zumaian egingo dugu, Alondegian, azaroaren 15ean, 18:30ean.

Hasierako ekitaldi horretan “Bakean dagoenari bakean utzi” antzerkia ikusiko dugu, Mirari Martiarena eta Idoia Torregarai umoregileen antzerkia.

Sinopsia

Euskara eta generoa binomioa gero eta garrantzi handiagoa hartzen ari da. “Euskaldunzte” kontzeptua protagonismo horren adierazle garbia da. Erlazio horren garrantziaz jabetuta daude gure bi protagonistak eta bikote horri hirugarren erpin bat gehitu nahi izan diote: umorea. “Bakean dagoenari bakean utzi” ikuskizuna elkarrekin lotzen diren elkarrizketek osatzen dute. Bertan, euskara eta generoari buruzko hainbat kontu aletzen dituztelarik, betaurreko umoreak jantzita: euskalkiak, amatasuna, onomatopeiak, gorpuzkerak, euskarakadak... Bakean dagoena bakean uzteko ez daude prest!

Mintzalagun programa: zer da?

Mintzalagun Programak euskaraz dakiten pertsonak (bidelagunak, euskaldun zaharrak) euskara ikasten ari direnekin (bidelariekin, euskaldun berriekin) elkartzen ditu astean ordubetez euskaraz hitz egin dezaten. Zer lortzen dugu?

  • Bidelariak, euskaldun berriak: euskaraz hitz egiteko aukera du, bertako hizkera ezagutu eta ikasteko; jendea ezagutzeko eta euskaraz aritzeko harreman-sarea zabaltzeko aukera du.
  • Bidelagunak, euskaldun zaharrak: euskaldun berriei lagundu, bertako hizkera erakutsi, egiten ari diren ahalegina saritu eta aitortu…

Argibideak jasotzeko edo izena emateko:

Honako telefono eta helbideetara jo dezakezue argibideak jasotzeko eta izena emateko:

Urola Kostan 10 urte

2009an ekin genion Mintzalagun Programari. Ekimena Urola Kostako Udal Elkartearena eta eskualdeko udalena da. Programa antolatzen eta jarraipena egiten parte hartzen dute Urola Kostako AEKk, Zarauzko Udal Euskaltegiak eta udaletako eta Udal Elkarteko euskara zerbitzuek. Programa dinamizatzeko lanak Urola Kostako AEKk egiten ditu.

Programaren bilakaera ona izan da eta partehartzaile kopuruak gora egin du. 2009an 41 mintzakiderekin hasi ginen eta azken urteotan urtero 20 talde inguru eta 75-80 pertsonak hartu dute parte.

Asteroko hitzorduak, ekitaldiak, irteerak, zozketak

Mintzalagunak astero elkartzen dira, euskaraz aritzeko. Hori osatzeko, ikasturte hasieran eta amaieran ekitaldi bana egiten dugu; izan hitzaldi, diaporama emanaldi edo ipuin emanaldi formatuan. Horrez gain, urte osorako hainbat proposamen bideratzen dira: irteerak, topaketak, eskualdeko kultur emanaldietara joateko sarrerak, etab.