Palestinako errealitatea ezagutzeko asmoz, gazteentzat komiki tailerra egingo da martxoan
UNRWA Euskadik, Palestinako errefuxiatuentzako Nazio Batuen Agentziak antolatu du ekimena, Kultura sailarekin elkarlanean. Martxoaren 9, 10 eta 12an izango dira saioak, 2 orduko hiru, Alondegian. 12-17 urte bitarteko gazteentzat dago zuzendua zikloa.
2018an martxan jarritako Hiritartasun Globalerako Hezkuntza proiektu baten baitan antolatu du UNRWA Euskadik Zumaiako kultur sailarekin elkarlanean “Palestinako errealitatea ezagutuz” komiki tailerra.
Tailerra 12-17 urteko gazteei zuzenduta dago, 6 orduko iraupena izango du eta doakoa izango da. Tailerraren helburu nagusia euskal gazteriak Ekialde Hurbileko errefuxiatuen inguruan eta, bereziki, Palestinako errefuxiatuen inguruan izan ditzaketen kultura- eta genero-aurreiritziak desegitea da. Saioetan, gazteek errefuxiatuen errealitatea ezagutzeko aukera izango dute eta baita komikiaren alderdi teknikoa lantzeko ere.
Tailerra UNRWA Euskadiko teknikariek eta Ainara Azpiazu “Axpi” komikigileak dinamizatuko dute eta 3 saio ezberdinetan burutuko da.