San Joan bezpera, bero boladan: su mugatuak eta beroari aurre egiteko gomendioak

San Joan bezpera da gaur, ekainak 23. Urtero bezala, Sanjuaniturrian sua piztuko dute 21:30ean, eta Gernika parkean 23:00etan, eta haren bueltan ospatuko dute udako solstizioaren etorrera. Bero bolada tarteko, intentsitate baxuagoko suak piztuko dituzte baimendutako leku horietan. 

Udalak gogorarazi nahi du galarazita dagoela herriko beste edozein lekutan sua piztea, bai espazio publikoetan, baita baimenik gabeko eremuetan ere. Zuhurtziaz jokatzea ezinbestekoa da, azken egunotako beroak eta lehorte-baldintzek sute-arriskua nabarmen handitu baitute.

Gaurko eta biharko Euskalmetek ezarritako alerta gorria tarteko, gainera, babes neurriak hartzeko gomendatu die Udalak herritarrei: 

• Kanpoan ez jardutea ezarritako ordutegietan.
• Ura edatea nahiz eta egarririk ez izan.
• Leku freskoetan eta klimatizatuetan egotea.
• Erabili arropa arina, txapela eta eguzkitako babesa.
• Arreta berezia adinekoei, haurrei eta gaixo kronikoei.

Bero babesteko, ondorengo lekuak izango dira zabalik:

• Alondegiko liburutegia (20:00ak arte zabalik).
• Alondegiko Oxford aretoa (20:30ak arte zabalik).
• Moilaberri (10:00etatik 14:00etara eta 15:00etatik 19:00etara).
• Emakumeon* Etxea (17:00etatik 19:00etara).
• Erkibeko lorategia.
• Gernika parkea.

Udalak azpimarratu du datozen orduetan prebentzioa eta ardura funtsezkoak izango direla suteak saihesteko eta tenperatura altuen ondorioak arintzeko.