Segurtasun neurriak indartuko dira santelmoetan
Azken bi urteotan bezala, festetan zehar udaltzaingo zerbitzua 24 orduz eskainiko da eta Ertzaintzaren pertsonala ere indartu egingo da.
Konturatu gabe iritsi dira aurten ere santelmoak. Aste Santua agurtu berri dugu eta jada bihar emango diegu ongietorria herriko jaiei.
Ildo horretan, azken bi urteotan egin bezala, zumaiarren segurtasun eta ongizatea lehenetsi eta bermatze aldera, aurten ere, festetan zehar udaltzaingo zerbitzua 24 orduz eskainiko dela adierazi du Udalak, zehazki hilaren 6an, 7an eta 8an eta baita jaien bigarren asteburuan ere, hau da, 13an eta 14an.
Horri lotuta, Ertzaintzaren pertsonala ere indartuko dela jakinarazi du Udalak, horrela, elkarlanean, zaintza zerbitzua hobetu eta zumaiar ororen lasaitasuna eta segurtasuna bermatzeaz gain, puntu beltzei edota elkarbizitza oztopatzen duten egoerei aurre egin eta horiek ekiditeko.
Amaitzeko, Udalak jai egun alai, bizi eta zoriontsuak izatea opa die herritarrei, berdintasunean eta errespetuan oinarrituta, ekintzez gozatu eta santelmoak elkarrekin giro onean disfrutatzeko.
