'Zumaia ezagutzen' programarekin herria ezagutuz

Zumaiako Udalak “Zumaia ezagutzen” ingurumen-heziketa programa sustatzen du, herriko ikasleei Zumaiak gordetzen duen ondarea ezagutarazteko asmoarekin. 2012-2013 ikasturtean, proiektua aurrera eraman da Zumaiako Herri Eskola, Maria eta Jose Ikastetxea, Oikiako Herri Eskola eta Zumaiako Institutuko 432 ikasleren parte hartzearekin eta Arazi enpresa proiektuaren garapenaz arduratu da.

Jarduera honen helburua, herriaren bilakaera historikoa eta ingurunearen garapena aurkeztea da, ikasleek ingurumenaren gaineko jarrera arduratsuak bereganatu ditzaten. Proiektua lau ekintzaz osatzen da, bakoitza adin tarte bateko ikasleentzat egokituta dagoela: “Denboraren bila”, Lehen Hezkuntzako 5. mailako ikasleentzat; “Argazki Rallya”, Lehen Hezkuntzako 6. mailako ikasleentzat; “Zumaia eta Artea”; Derrigorrezko Bigarren Hezkuntzako 1go mailako ikasleentzat; eta “Ontzigintza”, Derrigorrezko Bigarren Hezkuntzako 2. mailako ikasleentzat. Modu honetan, herriaren ezagutza sakona lortzeko egitarauak eskaintzen dira lau ikasturtetan.

Lehen Hezkuntzako 5. mailako ikasleekin garatzen den ekintzari amaiera emateko, herriaren egoera hobetzeko gutunak idatzi eta alkateari bidaltzen zaizkio. Gutun horiei erantzuna emateko, apirilaren 26an Zumaiako alkatea herriko 108 ikaslerekin elkartu da, herriaren egoeraren inguruan hitz egiteko helburuarekin. Horrela, hondakinak, bidegorriak, biodibertsitatea eta antzeko gaien jarraipena egin da, eta etorkizunera begira Zumaiaren egoera hobetzeko proposamen zehatzak aztertu.