Zumaiak gau zuria ospatuko du larunbatean

2018/05/23

Dendak gaueko 21:00ak arte zabalik egoteaz gain, eskaintza bereziak, zozketak eta hainbat ekitaldi ere izango dira herrian. Horrez gain, salgai daude turismo bulegoan merkataritza sustatzeko bonuak, 40€ ordainduta 50€ko balioa duten bonuak, alegia.

Datorren larunbatean, hilak 26, Gau Zuria ospatuko da Zumaian. Horren baitan, arratsaldean, 16:00etik aurrera hainbat karpa jarriko dira Erribera kalean eta bertan, elkarteko kide diren hainbat dendak euren produktuak jarriko dituzte salgai, eskaintza berezi edota deskontuekin. Egun hori beraz, erosketak egiteko aukera bikaina izango da herritarrentzat.

Gainera, karpak zein dendak zabalik egongo dira gaueko 21:00ak arte. Era berean, arratsaldean zehar, hainbat ekintza eta ekitaldi egingo dira. Esate baterako, 16:30-17:30 bitartean, Senzala Euskadi capoeira ikuskizuna egongo da, 18:00-19:00 bitartean, Yarleku antzerkia eta 19:30 eta 21:30 bitartean JJ Zumba familia ekitaldia, guztiak, Erribera kalean zehar.

Horrez gain, 300€ko zozketa egingo da egun horretan parte hartzen duten denda eta tabernetan kontsumitzen duten bezeroen artean. Eta hori gutxi balitz, 30€ko erosketak eginez gero, 5€eko deskontua lortzeko aukera ere izango dute bezeroek elkarteko taberna eta jatetxeetan gastatzeko.

Denda partehartzaileak: Ane Arribas, BIB decoracion textil, Coro Prieto estetika zentroa, JS Make-up estetika, Kaïoa, Koketa, Kulun.k, Marisa oinetakoak, Oskarbi kirolak, Pauma, Sorginak, Xumai kirolak.

Taberna eta jatetxe partehartzaileak: Batzoki Bai-Bidea, Gure Txokoa, Idoia ardotegia, Kalari, Marina Berri, Trapaia, Tximista, Zalla.

Merkataritza sustatzeko bonuak

Gau Zuria Udalak, Merkatari zein Ostalari Elkarteak, Caja Rural eta Eusko Jaurlaritzak antolatu dute elkarlanean, tokiko merkataritza indartu eta honi bultzada bat emateko xedez.

Horren harira, salgai jarri dituzte turismo bulegoan merkataritza sustatzeko bonuak, 40€ ordainduta 50€ko balioa duten bonuak, hain zuzen. Horiek maiatzaren 26tik ekainaren 3a arte gastatu ahal izango dira.