%3ko igoera udal tasa eta zergetan, 'zerbitzu publikoak kalitatez ematen jarraitzeko, eta udalaren inbertsio gaitasuna mantentzeko’

2024/09/30

Zumaiako udalbatzak 2025erako ordenantza fiskalak onartu ditu iraileko ohiko osoko bilkuran. Oro har, salbuespenak salbuespen, zergek eta tasak %3ko igoera izango dute, eta zenbait zerbitzu berri eta hobari egokitzapen jaso dira.

Zumaiako Udalak 2025erako ordenantza fiskalak onartu ditu, EH Bilduren eta EAJren aldeko botoekin, eta PSEren abstentzioarekin. %3ko igoera orokorra aplikatuko dute, herritarrei ematen zaizkien zerbitzuen kalitate ona mantendu, eta, Zumaiaren proiektu eta erronkei aurre egiteko ahalmenari eusteko. Unai Larrañaga ogasun zinegotziak eman zituen xehetasun guztiak.

Azken urteotan KPIaren igoera nabarmena izan dela aipatu zuen Larrañagak, eta horrek, herritarrei eragiten dien moduan, Udalaren gastuak ere handitu dituela –besteak beste, kontratatutako zerbitzuetan eta inbertsio kostuetan–. Gainera, haren esanetan, Zumaiako Udalak eskuartean dituen proiektu eta erronkak handiak izanik, eta "urteetan utzita zeuden ekipamendu publiko asko eraberritzeko lanetan murgilduta egonik", ezinbestekoa da behar horiei erantzungo dien fiskalitate eredua edukitzea. "Inbertsio ziklo horri eusteko eta udal zerbitzuen kalitatea ez murrizteko behar beharrezkoa da gure aurrezki garbia azken urteetan bezala mantentzea", adierazi zuen.

Zerga eta tasen bidez, herritarrek udalaren funtzionamendua finantzatzen dute, eta horri esker, herritar guztien ongizatea bermatzen duten azpiegiturak, zerbitzuak eta proiektuak gauzatu daitezke. Igoera neurtu hauekin, Udalak herritarren beharrei erantzuten jarraitu ahal izango du, zaurgarrienak babestuz eta herriaren garapenean inbertituz; hala nola, ekipamendu publikoen eraberritzean eta kaleen hobekuntzan. "Proposatutako igoerarekin herritarrek igoera neurtua jasango dute, eta udalak funtzionamendu egokian jarraitu ahal izango du", zehaztu du Larrañaga. Halaber, gogorarazi du oinarrizko beharrak ordaintzeko zailtasunak dituztenentzat Gizarte Zerbitzuen ateak zabalik daudela; eta, egoera horietan dauden herritarrak bertara jotzera gonbidatu ditu.

EAJk aldeko botoa eman zuen, eta, Iker Mardarasek eskertu egin zuen ordenantza fiskalak osatzerakoan izandako elkarlanerako jarrera eta gardentasuna; alderdi jeltzaleak familia ugarien definizioan zehaztapena txertatzeko proposamena aurkeztu zuen, eta emendakinari baiezkoa eman zion udalbatza osoak. PSE, bere aldetik, abstenitu egin zen.

Lau aldaketa-bloke nagusi

2025eko ordenantza fiskaletan lau aldaketa-bloke nagusi diseinatu ditu udal gobernuak. Unai Larrañaga ogasun zinegotziaren esanetan proposamen hauek “sentsibilitate handiz landuak” izan dira, herritarren ongizatea eta Udalaren finantza osasuntsua mantentzea helburu izanik. Honakoak dira aldaketa nagusiak:

  1. Aldaketa teknikoak: Lege eguneraketak eta terminologia hobekuntzak egin dira. Kirol Patronatuaren tasak, adibidez, Kiroldegiko tasa moduan izendatu dira. Jardueren tasestan ere argipena eta eguneratzea egin dute, nahasmenak saihesteko.

  2. Antolaketa aldaketak: Familia ugarientzako hobari eskaeren epea urtarriletik abendura aurreratuko da. Aldaketa honek familiak jokoz kanpo ez uzteko beharrezko komunikazioak egingo dira.

  3. Zerbitzu eta tasa berriak: Urtero bezala, udalak zerbitzu berriak sortzen jarraitzen du, eta, aurten, adibidez, Informatika Musikala edo Kiroldegian emango den 65 urtez gorakoen mantenu gimnasia ikastaroa sortu dira; horrenbestez, horiei dagozkien tasak txertatu dira. Horrez gain, istripu-atestatuen tasa berria ere ezarriko da Udaltzaingoak egiten dituen izapideetarako, inguruko herrietan bezala (tasa hau aseguru-etxeek ordaintzen dute).

  4. Tasen eguneratzeak: Hirigintza lizentzien tasa eguneratu da, eta udalekuak edo ludotekaren tasak igo dira, zerbitzu horien garestitzea dela eta –azken bi zerbitzu horien kostuaren %90 bere gain hartzen du Zumaiako Udalak–. Errioa zeharkatzen duen txaluparen txartelaren prezioa ere egokitu egin dute.

Uraren tasan igoera progresiboa

Uraren tasetan egindako igoera egiteko azterketa berezia egin du udal gobernuak, "kontsumo jasangarria bultzatzea eta progresibitatea bermatzea" helburu hartuta. Gipuzkoako Urakek altako uraren prezioa %11 igoko du 2025ean, eta azken hiru urteotan %28ko igoera jasan du Udalak zumaiarren uraren kontsumoari dagokionez.

Horiek horrela, egoera ahalik eta jasangarriena helburu, kontsumo jasangarria sustatzeko eredu progresiboa ezarriko du Udalak, kontsumitzaile txikiek eta handiek ordaintzen dutenaren artean bereizketa eginez. "Sortzen den defizita denon artean era berdinean ordaindu beharrean, kontsumitzaile handien eta kontsumitzaile txikien arteko ezberdintasuna eragin nahi izan dugu", azaldu du ogasun zinegotziak.

Horrenbestez, etxeko kontsumitzaile gehienek oso igoera txikia izango dute –bi euro inguru hiruhilekoan, kasu gehienetan–; eta, merkatari txikiek eta kontsumo gutxiko enpresek jeitsiera izango dute, –30 euro ordaintzetik 15 euro inguru oraintzera pasako dira hiruileko gehienetan–. Bestalde, kontsumo handiko erabiltzaileei igoera nabarmenagoa izango dute. Udalak azaldu duenez, neurri hauek "herritarren egoera eta zaurgarritasunarekin sentsibilitatea izanda" hartu dira, udalaren egoera finantzario osasuntsua mantentzeko helburuarekin.

Kale garbiketa zerbitzuan eta etxez etxeko laguntza zerbitzuan hobekuntzak

Zumaiako Udalak kaleak garbitzeko eta etxez etxeko laguntza-zerbitzua kontratatzeko espediente berriak onartu ditu, bietan ere egun ematen den zerbitzua hobetzen jarraitzeko helburuarekin. Bi irizpenak ahobatez onartu zituen osoko bilkurak.

Kale-garbiketako zerbitzuaren kasuan, baliabide pertsonal eta material gehiagorekin indartuko da, erraztatzeko makina berri bat erostea eta astean bi egunetan bigarren laguntza-makina bat jartzea barne. Gainera, plaza eta espaloietan lurra garbitzeko ekipamendu gehigarriak jarriko dira, gainazalak irristakorrak gelditu ez daitezen. 3,26 milioi euroko balioa izango du kontratuak, eta bost urteko iraupena.

Bestalde, etxez etxeko zerbitzua emateko kontratuak hiru urteko iraupena eta 1,89 milioi euroko aurrekontua izango du gehienez. Langileen lan-baldintza hobeak bermatzeko kontratuaren prezioa handituko da, aldez aurretik haiekin adostu zen bezala. Gainera, kontratuaren oinarrizko prezio gainditzeko aukera aurreikusten da, egon litezkeen beharrei erantzuteko. Esleipena prozedura ireki eta arrunt bidez egingo da.

Bestelako gaiak ere aztertu dituzten, hala nola, taxien tarifen eguneratzea eta obra txikien jakinarazpenarekin lotutako ordenantzarekin lotutakoak.

%3ko igoera udal tasa eta zergetan, 'zerbitzu publikoak kalitatez ematen jarraitzeko, eta udalaren inbertsio gaitasuna mantentzeko’