Erribera 1eko urbanizazio obrak irailaren 15ean hasiko dira
Lanek bost hilabeteko iraupena izango dute aurreikuspenen arabera, eta Impercaya S.L. enpresa arduratuko da obrak gauzatzeaz. Jarduketek eragina izango dute aparkalekuetan eta ibilgailuen zirkulazioan, eta lanak faseka egingo dira, inguruko bizilagun, merkatari eta garajeetako erabiltzaileekin koordinatuta.
Zumaiako Udalak Erribera 1eko urbanizazio obrei ekingo die datorren astean, irailaren 15ean, eta lanek bost hilabeteko iraupena izatea aurreikusten da. Obraren sustatzailea Zumaiako Udala da, eta lanak Impercaya S.L. enpresa eraikitzaileak egingo ditu, BEZa barne, 414.165 euroko aurrekontuarekin.
Helburua Erribera 1 inguruko urbanizazioa hobetzea eta espazio publikoaren baldintzak berritzea izango da. Lanak faseka egingo dira, eta horien garapenak eragina izango du eremuko aparkalekuetan, ibilgailuen zirkulazioan eta zenbait sarbidetan.
Lehen faseko aldaketak
Obrak hastearekin batera, lan-eremua hesitu eta beharrezkoak diren etxolak eta bestelako baliabideak kokatuko dira. Horretarako, hainbat aparkaleku kenduko dira: goiko plataformako aparkaleku guztiak, Bonifazio Etxegaraiko guztiak eta Zuloaga plazako zebra-bidearen ondoko bizpahiru aparkaleku.
Era berean, ibilgailuen zirkulazioa desbideratu egingo da. Ibilgailuak aparkalekuen eremutik jaitsiko dira, eta errepidearen eta ondoko espaloiko zati baten erabilera mugatuko da obra-lanek irauten duten bitartean.
Udalak ahalik eta neurri handienean bermatu nahi ditu eremuko atari, merkataritza establezimendu eta garajeetarako sarbideak. Hala ere, lanen bilakaeraren arabera, une jakin batzuetan sarbideak aldi baterako mugatu beharko dira.
Garajeetako erabiltzaileek ere, une puntualetan, ibilgailuak garajetik kanpo utzi beharko dituzte, lanen ondorioz sarrera eta irteera aldi baterako ezinezkoa izan daitekeelako.
Zuzeneko koordinazioa merkatariekin eta garajeetako erabiltzaileekin
Obrak eragindako merkataritza establezimendu eta garajeetako erabiltzaileekin zuzenean jarriko da harremanetan Udala. Enpresa eraikitzaileak harreman zuzena izango du eremuko establezimendu eta erabiltzaileekin, bakoitzaren egoera aztertu eta lanen antolaketa ahalik eta modu egokienean koordinatzeko.
Obrak hainbat fasetan egingo dira. Bigarren fasean beheko plataforma urbanizatuko da, eta lan horiek bertako ibilgailuei eragingo diete. Fase hori gerturatu ahala, Udalak beharrezko informazioa emango du.
Zumaiako Udalak ulertzen du obra hauek aldi baterako eragozpenak sor ditzaketela eremuko bizilagun, merkatari eta erabiltzaileentzat, eta haien lankidetza eta ulermena eskertu nahi ditu. Aldi berean, lanek ingurua hobetzeko eta herritarren erabilerarako espazio publikoaren baldintzak hobetzeko balioko dutela azpimarratu du.
