Maria Lopez Juezen kartelak iragarriko ditu Zumaiako inauteriak

2020/02/06
Bigarren urtez jarraian saritu dute Lopez 2020ko Inauterietako kartel lehiaketan. Aurkeztutako lan guztiak Alondegian daude ikusgai.

Pailazoz mozorrotutako arrain koloretsuak iragarriko ditu 2020ko Zumaiako inauteriak. Maria Lopez izan da saritua bigarren urtez eta 300 euroko saria jasoko du.

Dozena bat kartel aurkeztu dira aurten lehiaketara, eta dagoeneko ikusgai daude Alondegiko sarreran, herritarren sariaren bozketarako. Otsailaren 24ra bitarte egongo da erakusketa zabalik, eta han bertan jasoko dira herritarren sarirako botoak. Zumaiarrek gustukoen duten kartelaren egileak herriko jatetxe batean bi lagunentzat afaria eskuratuko du, eta bozkatzen dutenen artean berriz, bi liburu sorta zozkatuko dira.