Itsaslabarretatik paduretara, Zumaiako naturgune babestuak

Udalerriak balio ekologiko eta geologiko handiko hainbat naturgune babestu ditu, eta horiek Euskal Herriko natur ondare aberatsenetako bat osatzen dute. Ingurune horietan, milioika urteko Lurraren historia irakur daiteke, eta, aldi berean, flora eta fauna espezie ugariren bizileku dira.

Zalantzarik gabe, ezagunena Deba-Zumaia Paisaia Natural Babestua da. Bi herrien arteko kostaldean hedatzen den zortzi kilometro inguruko eremuak nazioarteko ospea du, flysch izeneko harkaitz geruzen segidari esker. Geruza horietan Lurraren azken 60 milioi urteetako historia geologikoa gordetzen da, eta Kretazeoaren eta Tertziarioaren arteko muga bezalako aztarna zientifiko garrantzitsuak ikus daitezke. Itsaslabarrek, marearteko zabalgune zabalak eta itsasoaren etengabeko higadurak paisaia paregabea sortu dute, zientzialarientzat nahiz bisitarientzat benetako altxorra bihurtuz. Baina gutxik dakiten zerbait ere azpimarratu behar da: ingurune horretako bioaniztasuna oso berezia da, eta hori da gunea babestuta egotearen arrazoi nagusia.

Baina Zumaian badira babestutako beste naturgune batzuk ere. Urola ibaiaren itsasadarra, esaterako, Natura 2000 Sarearen barruan dagoen Kontserbazio Bereziko Eremua da. Padura, lezkadia eta mareek moldatutako habitatak gordetzen ditu, eta hegazti migratzaile askoren atseden eta elikadura gune bihurtzen da urte osoan. Ekosistema horrek biodibertsitate handia biltzen du, eta naturaren oreka mantentzeko funtsezko zeregina betetzen du.

Itsasadarraren barruan, Beduako meandroa eta uharteak nabarmentzen dira. Urolaren urak eta mareek osatutako ingurune honek padura-ekosistema berezia sortu dute, landaredi eta hegazti espezie askorentzat babesleku bihurtuz. Nahiz eta azalera txikia izan, kontserbazio egoera bikaina mantentzen du eta naturaren dinamika gertutik ezagutzeko leku aparta da.

Bestalde, Santiago hondartzako dunak eta hezeguneak ere balio ekologiko handiko espazioak dira. Hondar dunek eta hezeguneek kostaldeko ekosistemak babesten dituzte, eta landare zein animalia espezie bereziak hartzen dituzte. Gizakiaren eta naturaren arteko oreka zaintzeko egiten den kudeaketari esker, ingurune horiek etorkizunerako babestuta mantentzen dira.

Babestutako naturgune horiek guztiak, gainera, Euskal Kostaldeko UNESCOren Munduko Geoparkearen parte dira. Geoparkeak geologia, natura eta kultura uztartzen ditu, eta helburu bikoitza dauka: ondare apart hori zaintzea eta modu jasangarrian ezagutaraztea. Gainera, guztiak Flyschenea Museoan azalduta izango dituzu laster. Museo berria berehala izango da zabalik eta nahi duzun erritmoan guztia errazago ulertzeko aukera eskainiko dizu.

Horrela, Zumaia helmuga erakargarria da bai natura zaleentzat, bai Lurraren historiaren sekretuak ezagutu nahi dituztenentzat. Zatoz, eta goza ezazu naturaz!