Amaitu da TAO sistemaren udako aldia

TAO sistema uztailaren 1etik aurrera egon da indarrean, eta gaurtik aurrera, herriko egoiliar guneak edota errotazio altu zein TAO eremuak ez dira indarrean egongo. Dena den, iaz bezala, salbuespenak egongo dira eta urte osoan zehar erregulatuta jarraituko duten guneak egongo dira: Ardantzabide kalean egoiliarren eremua mantenduko da, eta hainbat gunetan errotazio handiko eremuen sistema aplikatuko da (albistearen amaieran ikusi daitezke zehaztapen guztiak).

Halaber, urtea amaitu aurretik aparkalekuen erregulazio sistema birpentsatzeari ekingo dio Zumaiako Udalak. Udal Gobernuak azaldu duenez, enpresa kudeatzailearekin balorazioa egin ostean, gaia udal batzordeetan eta mahai teknikoan landuko dute; ondoren, parte hartze saio irekiak antolatuko dituzte TAO sistema lantzeko. Izan ere, bada denbora Zumaiako TAO sisteman hutsune batzuk identifikatu dituztela, eta sistema ahalik eta sinpleena eta erosoena izan dadin herritarrekin batera aztertuko dute gaia.

Covid-19ak epeetan eragindako atzerapenak direla eta, TAO sisteman ohi baino beranduago sartu da indarrean aurten, eta bestalde, udaran zehar hainbat arazo tekniko izan dira. Gainera, bada denbora TAO sistemaren Zumaiako eredua sinplifikatzeko eta egokitzeko beharra identifikatu zenetik, eta pasa den martxoan hasitako hausnarketa prozesua eten egin zen konfinamenduagatik. Horren eraginez, aurten sartu behar ziren hainbat hobekuntza ezin izan dira indarren jarri, eta datorren urtetik aurrera aplikatu beharko dira, herritarrek parte hartze prozesuan esaten dutenaren arabera.

Aparkalekuen erregulazio sistema zerbitzuaren arauak (irailaren 16tik aurrera):

Egoiliarren eremuak:

• Ardantzabide kalea urte osoan zehar egoiliarrentzat gordeta egongo da. Horietan Ardantzabide kalean aparkatzeko baimena duten egoiliarrek aparkatu ahal izango dute.

• Gainontzeko eremuetan egoiliarren sistema ez da aplikatuko urtean zehar.

Errotazio altuko eremuak:

• A eremua: Urte osoan zehar indarrean. Ordu muga, orain arte bezala, 90 minutukoa izango da. Ibilgailua Zumaian erroldatuta dutenentzat bertan aparkatzeak doakoa izango da. Gainerako ibilgailuek doan izango dituzte lehen 30 minutuak. Edozein kasutan, ezinbestekoa izango da orain arte bezala tiketa makinan inprimatzea.

A1 azpi-eremua: Txomin Agirre Kaia

Astelehenetik ostiralera 8:00etatik 20:00etara

Larunbatetan 8:00etatik 13:00etara

A2 azpi-eremua: Amaiako Plaza

Astelehenetik ostiralera 8:00etatik 20:00etara

Larunbatetan 8:00etatik 13:00etara

A3 azpi-eremua: Anbulatorioa

Astelehenetik ostiralera 8:00etatik 17:00etara

• C eremua: Udaletxe pareko gunea. Urte osoan zehar indarrean. Ordu muga, orain arte bezala, 30 minutukoa izango da.

Astelehenetik ostiralera 8:00etatik 15:00etara

Larunbatetan 8:00etatik 12:30era

• Gainontzeko eremuetan (B1: Zubitxikitik Moilaberriko zubira; B2: Alai, Eroski aurreko gunea) errotazio handiko eremuen arauak ez dira aplikatuko urte osoan zehar.

Albiste erlazionatuak