Hogarreko taberna itxita egongo da hautaketa prozesu berria amaitu bitartean

2020/10/01
Hogarreko gainontzeko zerbitzuak eta guneak erabilgarri egongo dira aldi honetan. Taberna kudeatzeko deialdi berria datorren astean argitaratuko du Zumaiako Udalak.

Gizarte Zentroko taberna-jatetxea kudeatzeko deialdia hutsik gelditu zen, eta Udalak bigarren deialdi bat zabalduko du datorren astean. Horrenbestez, hautaketa prozesua egin bitartean taberna itxia egongo da.

Dena den, Hogarra zabalik egongo da ohiko ordutegian, 9:00etatik 20:30era, eta gainontzeko zerbitzuak erabilgarri egongo dira. Ileapaindegi eta podologo zerbitzuak martxan jarraituko dute, eta Gizarte Zentroan biltzen diren elkarteek ere ohiko jarduerarekin jarraituko dute –Emakumeon* Etxea, Nagusilan Elkartea eta Beheko Plaza jubilatuen elkartea bildu ohi dira bertan–. Halaber, lehenengo pisuko egongela eta bigarren pisuko telebista gela ere zabalik egongo dira; gune horietan erabiltzaileen ardura da beharrezko babes neurriak hartzea.

Adinekoentzako jarduerak

Beheko Plaza jubilatuen elkarteak hainbat ekintza antolatu ditu ikasturte honetarako; mantentze soinketan, yogan eta dantzan parte hartzeko aukera izango da aurtengoan. Jarduera horietan parte hartzeko Hogarrean eman beharko da izena, urriaren 5etik 7ra bitartean, 11:00etatik 12:00etara.

Bestalde, Udal Gizarte Zerbitzuek Tipi-tapa tailerra eta oroimena lantzeko tailerra antolatuko dituzte beste urte batez. Tailer horietan parte hartzeko Brankan eman beharko da izena, urriaren 5etik 7ra bitartean, 9:00etatik 13:00era.

Jakinarazi dute ekintza guztietan edukiera murriztuko dutela, eta osasun neurriak gordetzeko protokoloa beteko dutela.

Informazio gehiagorako:

  • 943 86 22 00
  • brankaharrera@zumaia.eus