Hondakinen edukiontzi guneetan aldaketak egingo ditu Udalak

Herritarren kexak kontutan hartuta, eta UKUEko Hondakinen Bilketa Zerbitzuarekin batera egoera aztertu eta gero, Zumaiako Udalak herriko zenbait bilketa-gunetan aldaketak egingo ditu. Urola Kostako Udal Elkarteko langileek aldatuko dituzte tokiz edukiontziak.

Honakoak dira aldaketa nagusiak:

• Bonifacio Etxegarai-San Jose bidegurutzea. Bertako bilketa-gunea ezkaratzetik aldenduko da, eta gune horretako ontzi arinen edukiontzia Foruen plazara mugituko da (udaletxe parera), gaur egun beiraren edukiontzia dagoen gunearen ondoan jartzeko.
• Ardantzabide. Rokodromoaren ondoan kokatuta dagoen bilketa-gunea Ardantzabide kalearen hasierako plazatxora mugituko da. Beiraren edukiontziak orain arteko lekuan segiko du.
• Bidasoa kalea. Txikixa tabernaren parean kokatutako bilketa-gunean espaloi gainean kokatuta dauden edukiontziak bakarrik mantenduko dira, eta beira eta ontzi arinen edukiontziak kendu egingo dira (aparkalekuetan kokatutakoak). Bidasoa eta Juan Belmonte kaleen arteko bidegurutzean kokatutako edukiontziak nahiko direla aurreikusi da; baina beharrezkoa izanez gero, Bidasoa kaleko bilketa-gunea indartuko da, berriro ere.

Hiru gune horietan egingo diren aldaketez gain, Zumaiako Udala eta UKUE Aita Mari auzuneko bilketa guneen azterketa egiten ari dira, irtenbide egokiena topatzeko.

Bide batez, Zumaiako Udalak herritarrei gogorarazten die hondakinak sailkatzea eta dagokion edukiontzian sartzea betebeharra dela, eta arduraz jokatzeko deia egiten die. Halaber, azpimarratu nahi du hondakin handiak uzteko tartea ostegun iluntzea dela (20:00etatik 22:00etara), eta debekatuta dagoela gainontzeko egunetan halakoak kalean uztea. 

Albiste erlazionatuak