Hiru kirol proba herrikoi jokatuko dira Zumaian eguberrietan

2019/12/11

Abenduaren 24ean areto futbol txapelketa azkarra jokatuko da, abenduaren 26an xake txapelketa, eta abenduaren 31n X. San Silvestre Lasterketa. Dagoeneko izena eman daiteke hiru probetan.

Gabonen bueltan hiru kirol proba herritar jokatuko dira herrian. Izen ematea doakoa da hiru txapelketen kasuan.

Ondorengo lerroetan txapelketen inguruko informazio guztia aurkituko duzu:

Areto futbol txapelketa

Abenduaren 24ean, asteartean, jokatuko da sariketa Lubaki Kiroldegian. 9:15ean hasi eta goiz osoan zehar iraungo dute partidek. Abenduaren 20a baino lehen eman beharko dute izena parte hartu nahi duten taldeek, eta izen-ematea doakoa da.

Parte hartzeko baldintzak honakoak dira:

Doakoa da izen-ematea
Taldeka parte hartuko da
16 urtetik gorakoentzako txapelketa da
Izen-ematen duen talde bakoitzak epaile bat proposatu beharko du

Izen-emate prozedurari dagokionez:

Epea: abenduaren 20a, 18:00ak arte
Lekua: Kirol Patronatuan (Lubaki kiroldegian)
Datuak: izen-emate orria beteta entregatu beharko da

Araudia izen-emate orriarekin batera emango zaie taldeekideei eta antolaketa-bilera abenduaren 20an izango da, 19:00etan Lubaki kiroldegian.

Informazio gehiago behar izanez gero idatzi kirolak@lubaki.eus helbidera.

IZEN-EMATE ORRIA

Xake txapelketa

Abenduaren 26an, ostegunean, Gabonetako Xake Txapelketa jokatuko da Alondegian, 16:00etatik aurrera.

Izen-ematea doakoa da eta bi kategoria desberdinetan jokatuko dira partidak:

14 urte baino gutxiagoko parte hartzaileak (16:00etan)
Helduak (18:15ean)

Izen-emate prozedurari dagokionez:

Epea: abenduaren 25a, 18:00ak arte
Emailez (zumaiakoxaketaldea@gmail.com) edo telefonoz (630937041) eman daiteke izena

Zumaiako X. San Silvestre Lasterketa

Abenduaren 31n, asteartean, izango da lasterketa. Eusebio Gurrutxaga Plazatik abiatuko da proba, 12:00etan. Doakoa da izen ematea.

Kirol proba honetan ez da sailkapenik egongo, eta parte hartzaile guztien artean kirol materialarekin osatutako sortak zozketatuko dira.

Proba lautan banatzen da, adina eta probaren luzeraren arabera:

Haurrak (LH1-LH2): 250 metroko lasterketa (heldu batekin batera egin beharko dute proba)
Haurrak (LH3-LH4): 250 metroko lasterketa (binaka egingo dute lasterketa)
Haurrak eta nerabeak (LH5-DBH2): 1.100 metroko lasterketa (binaka egingo dute lasterketa)
14 urtetik aurrerako gazte eta helduak: 5.000 metro (banaka, korrika edo patinetan)