Zumaiako hainbat gunetan doako WiFi publikoa erabilgarri dago dagoeneko

2020/11/24
Herriko plaza eta eraikin publikoen inguruetan Wi-Fi publikoa erabili ahal izango dute herritarrek aurrerantzean. WiFI4EU Europar Batasuneko ekimenaren baitan garatu da proiektua.

Zumaiako Udalak WiFi4EU programan parte hartzeko eskaera egin zuen 2018an. Eskaeraren onarpen eta gero, beharrezko izapideak egin eta proiektua zehaztuta, herriko plazetan eta hainbat eraikinetan WiFi sare publikoa eta doakoa erabili ahal izango dute herritarrek aurrerantzean.

Instalazio lanak amaitu dituzte dagoeneko, eta honako guneetan erabili ahal izango da WiFia:

  • Amaia plazan
  • Gernika parkean (Portuko geltokiaren inguruan)
  • Beheko plazan
  • Victoriano Arrate kalean
  • Aitzuri frontoian
  • Kiroldegiko harmailetan
  • Musika Eskolan
  • Komentuan
  • Oikiako plazan
  • Artadiko plazan
  • Narrondoko plazan

Horretarako, mugikorrean edo ordenagailuan WiFi-aren aukeren artean “ZUMAIA WIFI4EU” aukeran klik egin beharko dute herritarrek. Baldintzak onartu eta gero, gailua bi orduz egongo da sarera konektatuta, betiere konektatutako gune horren inguruan egonez gero. Bi ordu eta gero, konektatuta jarraitu nahi izanez gero, sarera konektatzeko pausu berdinak jarraitu beharko dira berriro.

WiFi4EU programa

WiFi4EU Europar Batasuneko ekimenak, espazio publikoetan, hau da, parke, plaza, eraikin ofizial, liburutegi,osasun zentro edota museoetan, herritarren wifirako sarbidea bultzatzen du eta horretarako diru-laguntzak eskaintzen dizkie Europako udalerriei. Ekimenaren inguruko informazio gehiago izateko, sartu lotura honetan.