Kiroldegian eta kultur ekitaldietan ohiko funtzionamendua berrezarriko da ostiral honetan

LABI batzordeak hartutako erabakiarekin bertan behera geratu da osasun larrialdia, eta orain arte indarrean izan diren neurri murriztaile gehienak indargabetuta geratu dira. Besteak beste, espazioetako edukieran, kultur eta kirol ekitaldietan eta ostalaritzan aldaketak eragin ditu aro berriak.

Zumaiako udal zerbitzuei dagokionean, aldaketa handienak kiroldegian eta kultur arloan izango dira. Kiroldegira joateako, aurrerantzean, ez da txandarik hartu beharko. Aldagelei dagokionez, orain arteko antolaketa sistemarekin jarraituko da: eremu edo jarduera-gune bakoitza erabiltzean, bertako aldagela soilik erabili ahal izango da. Halaber, funtzionamendu arrunta berrezartzen denez, urtarriletik aurrera bazkideek kuotaren %100a ordaindu beharko dute.

Kultur arloan ere eragin nabarmena izango du azken erabakiak, orain arteko aforo arauak bertan geratuko baitira. Horrenbestez, kultur ekitaldietarako sarreren lehengo funtzionamendua berreskuratuko da. Hala, sarrera duten ekitaldietan, herritarrek bi aukera izango dituzte: sarrera aurrez turismo bulegoan erostea eta, sarrerarik geratuko balitz, sarrera ekitaldiaren hasieran aretoan bertan erostea. Edonola ere, sarrerak aurrez erosteko aholkua ematen du kultur sailak. Doako ekitaldien kasuan, ekitaldi bakoitza iragartzean zehaztutakoa jarraitu beharko dute herritarrek.

Azkenik, arau gehienak bertan behera gelditu badira ere, Zumaiako Udalak gogorarazi nahi du kirol eta kultur espazio itxietan, maskara erabiltzeak derrigorrezkoa izaten jarraitzen duela. Halaber, osasun neurri orokorrak betetzen jarraitzea eskatu nahi die herritarrei.

Albiste erlazionatuak