Zesta punta eta esku pilota jaialdi ikusgarriak izango dira datozen bi asteetan Aitzuri pilotalekuan

Aitzuri pilotalekuan, aurten ere pilota jaialdi ikusgarriak antolatu ditu Udalak zesta puntako Eraman Jai Alai enpresarekin eta esku pilotako Aspe enpresarekin elkarlanean. Datozen bi asteetan, pilotazaleak gozatu ederra hartzeko aukera izango du. Zesta puntan, Zumaia Jai Alai Masters txapelketaren bigarren edizioa jokatuko dute hamasei pilotarik: lehen aldiz, zortzi emakumezkok, eta beste horrenbeste gizonezkok. Tartean izango dira hiru zumaiar: Frida Watkins, Imanol Lopez eta Unai Uranga.

Datorren astelehenean, apirilaren 14an emango zaio hasiera txapelketari, 19:00etan. Bi partida hauek jokatuko dituzte: Sorozabal-Maialen / Ihart-Frida, eta Olharan-Lopez / Urreisti-Manci. Apirilaren 21ean izango dira bigarren finalerdiak, 19:00etan hauek ere: Elaia-Oaia / Helena-Maia, eta Barandika-Zabala / Erkiaga-Uranga. Bikote hau da, hain zuzen, iazko txapelketako irabazlea, eta txapelari eusteko aukera izango dute aurten. Finalak San Telmo egunean izango dira, apirilaren 28an, 19:00etan.

Sarrerak eta hiru jaialdietarako bonoak webgune honetan daude salgai: https://www.eramanjaialai.com/sarrerak-entradas/

Hiru egunetarako bonoak 30 € balio ditu, eta sarrerak jaialdika erosiz gero, finalerdi bakoitza 10€ da, eta finala 15€.

Esku pilotako jaialdiari dagokionez, San Telmo bezperan jokatuko dute, apirilaren 27an, 17:15ean. Bi partida izango dira: batean, buruz buruko txapelketa nagusian, final-laudenetako ligaxkako bigarren jardunaldian, Peio Etxeberriak Iñaki Artola edo Aitor Elordi izango du kontrario. Binakako partidan, Ezkurdia-Zabaleta ariko dira batetik, eta Peña II.a-Mariezkurrena, bestetik.

Jaialdi honetarako sarrerak ere salgai daude, beste webgune honetan: https://entradasfronton.com/.

Sarrerak 25€ eta 30€ balio dute.

Albiste erlazionatuak