Alarma egoera bertan behera gelditu arren, orain arteko neurriak mantenduko ditu Udal Gobernuak ekipamendu eta ekimenetan

2021/05/13
Kultur ekitaldien eta kiroldegiaren ordutegietan aldaketak izango dira, baina aforoaren irizpideak eta bestelako segurtasun neurriak bere horretan mantenduko dira.

Aurreko astean Espainiako gobernuak alarma egoera bukatutzat eman, eta ondorioz, Araba, Bizkaia eta Gipuzkoako zenbait babes-neurri bertan behera utzi ondoren, Zumaiako Udal Gobernuak azpimarratu nahi du orain arteko neurri berdinak mantenduko dituela bai udal ekipamenduetan, baita Udalak antolatutako ekitaldi guztietan ere.

Aurretik ere legeak zehaztutako babes-neurriak baino zorrotzagoak aplikatzen ziren, eta oraindik ere, egoera hobetu ezean, berdin mantenduko dira. Hori horrela, segurtasun berme guztiak betetzen jarraitzearen aldeko apostua egingo du Udal Gobernuak, jada legeak hori agintzeari utzita ere.

Hala, zenbait aldaketa txiki izango dira ordutegiei dagokionean: kiroldegian ohiko ordutegia jarri da martxan, eta kultur ekitaldien ordutegian ere aldaketak izango dira. Edonola ere, aforo irizpideei eta bestelako segurtasun neurriei dagokionez ez da inolako aldaketarik egingo.

Bukatzeko, herritarrei eta erakunde guztiei berriz ere bakoitzak bere esku dagoena egin eta egoera hobetzeko beharrezko jarrerarekin jarraitzeko deia egiten die Udalak.