'Gazteak euskararen eszenatokian: erabileraren auzia' ikerketa kualitatiboaren emaitzak argitaratu ditu Soziolinguistika Klusterrak

2020/10/08

Azterketa egiteko aukeratutako lau udalerrietako bat izan da Zumaia.

Gazteen euskararen erabilerarekin lotura duten faktoreak izan dira aztergai "Gazteak euskararen eszenatokian: erabileraren auzia" ikerketan. Lau udalerri aukeratu ziren lan honetarako: Amorebieta-Etxano, Gernika-Lumo, Pasaia (Donibane), eta Zumaia. Horietantxe aritu dira ikertzaileak, "gazteei buruz baino gehiago, gazteekin, beren bizipenei hitzak jartzen eta beren portaerak xehatzen". Zehazki, euskararen erabileraren inguruko diskurtsoa eraikitzeko aukera eman zaie gazteei, mugarik gabe, euren interes eta esperientziatik.

Zumaian pasa den martxoan aurkeztu zituzten herriko gazteekin izandako elkarrizketetatik ateratako ondorioak, "Euskara, bestela ez gara" hitzaldi-zikloaren baitan. Jone Miren Hernandez eta Josu Ozaita gizarte antropologo eta ikertzaileek Soziolinguistika Klusterraren eskutik egindako ikerlanaren emaitzak azaldu zituzten. Haien esanetan "gazte kultura zabal eta konplexu batean txertatzen dira Zumaiako gazteak, globalak diren zenbait joera partekatuz, baina, aldi berean, tokian tokiko egunerokotasuna kudeatzeko estrategia propioak asmatuz eta erabiliz. Errealitate konplexu honetan txertatzen da hizkuntza ere, euskara". 

Orain, ikerketa lan horren emaitzak argitaratu dituzte. Lotura honetan irakurri ditzakezu.

Euskararen presentzia hiru dimentsiotan

Hiru erabilera “mota” bereizi dira: 1) Erabilera ideologikoa: euskara gizartean jartzen duena 2) Erabilera kokatua: espazio jakinetan euskararen erabileraren legitimazioa –edo legitimazio eza- aztertzen duena. 3) Erabilera bizitua: erabilera sentitua eta performatua, hau da, hizkuntza eta identitatea lortzen dituena.

Hiru dimentsioetan euskarak duen presentzia/ausentzia aztertu da, hainbat galderatan oinarrituz: Zer diskurtso dute gazteek euskararen inguruan? zein iritzi dute euskalgintzari edota hizkuntza politikari buruz? non dago euskara euren eguneroko praktiketan eta eurentzako erreferente diren esparruetan? zein praktikek eta harremanek ahalbideratzen dute euskararen presentzia handiagoa? zein lotura dute gazteek euskararekin, euren barne elkarrizketetan, euren mundu emozionalean, euren burua definitzeko eta agertzeko moduan?

Ikerketaren emaitzak: "Gazteak euskararen eszenatokian: erabileraren auzia"

'Gazteak euskararen eszenatokian: erabileraren auzia' ikerketa kualitatiboaren emaitzak argitaratu ditu Soziolinguistika Klusterrak