Gune Morea egongo da Saregile plazan apirilaren 23an eta 30ean, eraso matxistarik gabeko festak sustatzeko

Zumaiako Udalak mugimendu feministarekin eta Emakumeon* Etxearekin koordinatuta prestatu du Gune Morea. Helburua da eraso matxisten aurkako erreferentziazko gune seguru bat egotea festa giro erdi-erdian. Eraso matxistak salatu nahi dituztenek, protokolo feminista ezagutu nahi dutenek edo gaiaren inguruan esatekorik dutenek gune propio bat izango dute Saregile plazan. Daiteke aholkularitza taldekoak ariko dira hezitzaile lanetan santelmoetako bi larunbatetan (apirilaren 23an eta 30ean), 19:00etatik 21:00etara eta 00:00etatik 02:00etara.

Eraso edo jarrera sexista, LGTBI+fobiko zein arrazistak jaso dituztenak, zein festa giroaren inguruko iritzi eta ekarpenak egin nahi dituztenak Gune Morera gerturatzera gonbidatu dituzte. Gainera, Gune Morean pegatinak, eskuorriak, txapak eta bestelakoak edukiko dituzte eskuragarri herritarrek. 

Zumaiako Mugimendu Feministak, bere aldetik, manifestazioa antolatu du santelmoetako lehen larunbaterako. 23:30ean hasiko da txosnagunetik, "Kaleak eta gauak gureak dira!" lemapean. Horrez gain, errepetizioetako ostiralean poteo feminista egingo dute.

Festak aske bizitzeko guztion ardura ezinbestekoa dela nabarmendu nahi du Zumaiako Udalak. Zentzu horretan, herritar guztiei eraso matxisten aurrean, konplizitateak alde batera utzi, eta arduraz eta konpromisoz jokatzeko eskaera egiten die. Azkenik, Zumaiako Udalak gogorarazi du Udaltzaingoa gau osoko txandak egiten arituko dela santelmoetan, eta beharrezko jotzen denetan, bertara (Udaltzaingoa: 943 14 32 32) edo larrialdi zerbitzuetara (112) deitu daitekeela azaldu du.

Kontsumo arduratsua sustatzeko kanpaina ere abian

Indarkeria matxistaren aurkako prebentzio neurriak hartzeaz gain, Zumaiako Udalak nerabeek alkoholaren kontsumo arduratsua egin dezaten kanpaina jarriko du martxan santelmoetako bi larunbatetan, AiLaket! elkartearen eskutik. Hain justu, elkarteko hezitatzaileak Zumaiako kaleetan zehar ibiliko dira, kontzientziazio lanetan, 20:30etik 00:30era.

Albiste erlazionatuak