Arrakasta handia izaten ari da PLAZerA ihes-gela, eta txanda berriak gehitu dituzte
Ihes-gela berezi honek harrera bikaina izan du, eta orain arte 400 pertsona inguru igaro dira bertatik. Martxoaren 29ra bitartean egongo da zabalik.
Bonbillobekoa kaleko 6. atariaren ondoan ate deigarri bat dago 2024ko irailetik. Plazeraren inguruan hausnartzeko ihes-gela berezi honek harrera bikaina izan du, eta orain arte 400 pertsona inguru igaro dira bertatik: %40 Zumaiakoak izan dira, eta gainerakoak Donostia, Beasain, Tolosa, Lasarte, Zarautz, Deba, Mutriku, Ondarroa, Bilbo eta beste hainbat udalerritatik etorri dira.
Harrera ona ikusita, antolatzaileek bi txanda berri gehitzea erabaki dute. Horiek horrela, martxoaren amaierara bitartean honako txandak egongo dira eskuragarri:
- Ostegunak: 16:30 / 18:00
- Ostiralak: 16:30 / 18:00 / 19:30
- Larunbatak: 10:30 / 12:00 / 13:30
> Hartu txanda
Partehartzaileak plazeraren inguruan hausnartzera gonbidatzen dituen jarduera pedagogiko eta ludikoa da honakoa. Scape room bezala ere ezagutzen den jarduera honetan, bi eta bost pertsona arteko taldetan erlojuaren kontra ariko dira; plazerarekin lotutako galderak eta erronkak gainditu beharko dituzte, 60 minutuan gelatik irtetea lortzeko helburuarekin.
Zer da? Zerk eragiten dit eta digu? Non plazaratzen dugu? Zentzumenek zein papera betetzen dute? Zein da plazerren plaza? Nora eraman gaitzake plazerak? Denbora edo espazioan neurtuko zenuke? Galdera, erronka, bizipen anitzak egongo dira baina oraingo honetan taldean elkartu, izen etorri PLAZerA ihes-gela pedagogikora eta egin aurre froga, enigma eta erronkei, oso adi egon beharko duzue, irtetea ez baita erraza izango!!!
PLAZerA ihes-gela jarduera, Sorginlore Gizarte Elkarteak eta Ikertze Kultur elkarteak antolatu dute, eXperientziak elkartea eta Ana Orozko arte zuzendariarekin batera, Zumaiako Udalarekin elkarlanean eta eLankidetza: Lankidetzarako eta Elkartasunerako Euskal Agentziaren babesari esker.
