More dator martxoa Zumaiara, feminismoa aldarrikatu eta gozatzeko egitarau zabalarekin

Martxoaren 8a Emakume Langilearen Nazioarteko Eguna izanik, hilabete osorako egitaraua prestatu dute. Elkarlanean aritu dira ondoko eragileok: Emakumeon* Etxea, Zumaiako Mugimendu Feminista, Berdintasun Foroa, Malen Etxea elkartea, Hitzez emakume baserritarren elkartea eta Zumaiako Udala. Herriko eskolak ere bidelagun izan dituzte. 

Aldarrikapenez beteko dute Martxoaren 8a. 13:00erako manifestazioa deitu du mugimendu feministak, 'Faxismoaren kontra ausardia eta aliantza feministak!' lelopean. Lehenagotik hasiko dira aldarrikapenak, ordea: zuzeneko irratsaio formatuan askotariko gaiak izango dituzte hizpide Saregileen plazan 11:00etatik aurrera.

Martxoan zehar, gainera, askotariko ekitaldiak izango dira. Zumaiarrek formaziorako, eztabaidarako zein gozamenerako tartea izango dute ekitaldiokin:

• Martxoak 11, asteartea: Zaintza prozesuei buruzko topaketa egingo dute Basadi auzunean.
• Martxoak 13, osteguna: Virginia Imazen "Molestias clównicas" antzezlana ikusi ahal izango da Emakumeon* Etxean
• Martxoak 18, asteartea: Haurdunaldi subrogatuei buruzko analisi feministak izango dituzte hizpide, June Fernández kazetariaren eskutik.
• Martxoak 27, osteguna: Maialen Lujanbioren "RR_6_erre (AH) ala" emanaldia, Emakumeon* Etxean.

Horrez gain, indarkeria matxistaren biktimak gogoan hartzeko, martxoaren 5etik aurrera "Ausencias en rojo" erakusketa ikusgai egongo da Emakumeon* Etxean. Malen Etxeak eta Haurralde Fundazioak antolatu dute erakusketa, eta martxoaren 18ra bitartean egongo da ikusgai.

Azkenik, jakinarazi dute Zumaiako eskoletan formazio saioak egingo dituztela, eta gogorarazi dute PLAZERA ihes-gela zabalik dagoela oraindik (hartu txanda hemen).

Herritar guztiei dei egiten zaie ekitaldietan parte hartzera, feminismoaren aldeko borrokan elkarrekin hausnartu eta ekiteko.

Albiste erlazionatuak