Jabetze Eskolako tailerretarako izen-ematea astelehenean itxiko da

2019/10/11

Jabetze eskolaren baitan bi ikastaro antolatu dituzte: Autodefentsa feminista tailerra (euskaraz) eta Maitasun erromantikoaren eraispena (euskaraz eta gazteleraz). Izen emateko epea urriaren 14an, astelehenean, amaituko da.

Urritik abendura bitartean egingo dira Zumaiako Emakumeon* Etxeak Berdintasun Foroarekin elkarlanean antolatutako bi ikastaroak. Jabetze eskolaren baitan antolatutako ikastaroak dira eta bi tailerrak doakoak dira.

  • Autodefentsa feminista tailerrak hiru saio izango ditu (urriak 26, azaroak 30 eta abenduak 14). Torreberriko hirugarren solairuan eskainiko da 10:00etatik 14:00etara. Emagin erakundeak emango ditu saioak eta euskaraz izango dira.

  • Maitasun erromantikoaren inguruko tailerrak bost saio izango ditu dira (urriak 16, urriak 23, urriak 30, azaroak 6 eta azaroak 20) eta Hogarreko gela balioanitzan emango dira 18:30etik 20:30era. Loredi Salegik zuzenduko ditu saioak bi hizkuntzetan (euskaraz eta gazteleraz).

Ikastaroetan izen emateko bi aukera daude: zumaiakoemakumeonetxea@gmail.com eta 943 86 50 25 (luzapena 404). Urriaren 14a izango da azken eguna.

Zer da Jabetze Eskola?

Emakumeok* geure buruaren eta bizitzaren jabe izatea sustatzeko topagunea da. Bertan, ahalduntze prozesuak abiarazi edota indartzen dira: autoestimua landuz, gure gaitasunak ezagutuz, abilezia berriak eskuratuz, bizi ditugun injustizia egoerak identifikatuz eta jendartean dagokigun espazioa berreskuratuz. Ondorioz, gizarte bidezkoago, anitzago eta osoagoa lortzeko bidea da jabetze eskola.