Irailaren 9an zabalduko da Forondako ikastaroetan izena emateko epea

Zumaiako Udalak dagoeneko eman du 2025/2026 ikasturteko Forondako ikastaro eskaintzaren berri. Izen-ematea datorren asteartean (irailak 9) zabalduko da, irailaren 17ra arte. Urriaren 1ean hasiko dira ikastaroak, eta maiatzaren 29an amaitu.

Helduei zuzendutako ikastaro eta tailerrak honakoak dira: pintura (bi talde), oinarrizko zeramika (bi talde), zeramika aurreratua (bi talde), yoga (bi talde) eta egur taila. Jubilatu eta pentsiodunentzako espresuki zuzendutako yoga ikastaroa ere eskainiko da aurten ere –Torreberrin egingo dute–. Azkenik, haurrentzat eta nerabeentzat (LH3tik DBH4ra) prestatutako oinarrizko pintura ikastaroa izango da.

Ikastaro horiez gain, bestelako eskaintza ere badagoela gogorarazi dute, honakoak zehazki: Pand´oro elkarteak eskulan tailerra eta jostundegia antolatzen ditu; KZgunean teknologia berriei buruzko zerbitzu eta ikastaroak eskaintzen dira; eta, Musika, Dantza eta Antzerki eskolak ere eskaintza zabala du. Ikastaro eta tailer horietan izen-emateko, jarri harremanetan dagokion elkarte edo zerbitzuarekin.

Forondako ikastaroetan izen-ematea

Izena emateko epea irailaren 9tik 17ra egongo da zabalik, eta parte hartu nahi dutenek bi aukera dituzte:

• Formulario bidez

• Aurrez aurre: Alondegiko 1. solairuan, astelehenetik ostiralera, 09:30etik 14:00etara.
  Informazioa: 943 86 10 56 – alondegia@zumaia.eus

OHAR GARRANTZITSUAK:

• Formularioa betetzean, beharrezkoa izango da bankuko titulartasun agiria eranstea.
• “Oinarrizko pintura haurrentzat” ikastaroaren kasuan, familia ugariaren titulua ere aurkeztu beharko da, hala badagokio.
• Ikastaroetan tokiak baino eskaera gehiago badaude, herritarrek izango dute lehentasuna; ondoren, zozketa egingo da.
• Matrikularen ordainketa Udalak bi zatitan kargatuko du: lehenengo zatia irailean (urria-urtarrila), eta bigarrena urtarrilean (otsaila-maiatza). Ordainketa onartzen ez bada, tokia galduko da, eta itxaron-zerrendan dauden herritarrei eskainiko zaie.
• Behin ikastaroa hasita, ez da itzulketarik egingo, mediku-arrazoi justifikatuengatik ez bada.

Albiste erlazionatuak