LGTBI+ komunitatearen genealogiez eta orainaz arituko dira Laura Iparragirre eta Ismael Manterola hilaren 22an

2024/11/14

Zumaiako Emakumeon* Etxean egingo dute ekitaldia, irailaren 22an (ostirala) arratsaldeko 18:00etan. Unai Ribera Eiherako kideak elkarrizketan jarriko ditu Zumaiako bi LGTBI+ belaunaldi.

Zumaiako Udalak antolatuta, Genealogiak eta orainak. Zumaiako bi LGTBI+ belaunaldiren arteko elkarrizketa izango dugu herrian hurrengo ostiralean. Ekintza honen helburua Zumaiako LGTBI+ komunitatearen historia eta oraina aztertzea da, belaunaldi ezberdinen arteko elkarrizketa sustatuz eta askotariko bizipenak mahai gainera ekarriz.

Laura Iparragirre eta Ismael Manterola zumaiarrak izango dira saioko protagonistak, eta horiek solasean jarriko ditu Unai Ribera Eihera kooperatibako kideak. Edonola ere, indar bereziarekin gonbidatu nahi dituzte ekitaldira Zumaiako LGTBI+ komunitateko kide guztiak, hausnarketarako espazio kolektibo bat izatea nahi duten heinean. 

Zumaiako Udalak eta Eihera kooperatibak argi dute garrantzitsua dela LGTBI+ komunitatearen historia eta oraina ezagutzea, belaunaldien artean zubiak eraikitzeko eta kolektiboaren egoera hobetzeko. Horiek horrela, herritar guztiak gonbidatu dituzte saio honetara.

LGTBI+ pertsonen bizi baldintzak hobetzeko plana

Ekitaldi hau Zumaiako LGTBI+ pertsonen bizi baldintzak hobetzeko planaren barruan kokatzen da. Zumaiako Udalak 2020an abiatu zuen kolektibo honi lotutako lanketa, Eihera kooperatibaren bidelaguntzarekin, udal sailekin eta herriko gazteekin saioak eginez. Norabide zehatz baten beharra identifikatuta, 2022 amaieran politika eta neurri konkretuak biltzen dituen plana argitaratu zuten.

> Zumaiako LGTBI+ pertsonen bizi baldintzak hobetzeko plana
> Laburpena (eskuorria)

Helburu eta erronkak sei ataletan banatzen dira bertan: ikusgarritasuna, sentsibilizazioa eta aitortza; eskuragarritasuna; sozializazioa eta partehartze komunitarioa; indarkeria gabeko bizitzak; akonpainamendua, zaintza eta babesa; eta zeharkakotasuna. Horiei guztiei erantzuteko, 45 ekintza konkretuko plana prestatu dute. 

Plana sozializatu ondoren, 2023an ikusgarritasuna sustatzeko ikus-entzunezko hau argitaratu zuen Zumaiako Udalak, Eihera kooperatibarekin elkarlanean. Bertan, armairuaren inguruko hausnarketa egin zuten zenbait zumaiarrek:

LGTBI+ komunitatearen genealogiez eta orainaz arituko dira Laura Iparragirre eta Ismael Manterola hilaren 22an