Musi-K udalekuak, bertan behera

 Antolatzaileek matrikulazio garaian aipatu moduan, Musi-K udalekuak COVID-19ak sortutako egoeraren araberako aldaketen menpe egon dira hasieratik. Gaur gaurkoz, musika udalekuak baldintza egokietan egitea bermatuta ez dagoela ulertuta, udaleku musikalak bertan behera uztea erabaki dute Sapere Aude Sinfonietta elkarteak eta Zumaiako Udalak.

Musika udalekuen izaera bera izan da erabakia hartzeko arrazoi nagusia. Izan ere, udaleku musikalak -udaleku irekiak ez bezala-, eremu itxian egiten dira gehienbat. Gainera, haurren taldeak mantentzeko aurreikuspena bazegoen ere, irakasleak gelaz gela mugitzen dira, udalekuen izaera pedagokikoa dela eta.

Antolatzaileek dagoeneko jakinarazi die gurasoei erabakiaren berri, eta matrikularen prezioa osorik bueltatuko zaie familiei.

Udaleku irekien bigarren hamabostaldia, aurrera

Covid-19aren gorakada berri baten aurrean bagaude ere, Zumaiako Udalak udaleku irekiekin aurrera egitea erabaki du. Zerbitzu publiko bat izanik, eta familien kontziliazio arazoak eragozteko helburuarekin hartu du erabakia.

Positibo kopuruak gora egin duela kontutan hartuta, protokoloan aurreikusten diren babes neurriak indartuko ditu Udalak. Edonola ere, Udalak eta hezitzaile taldeak nabarmendu nahi dute haurrek gozatzeko aukera izango dutela.

Albiste erlazionatuak