Zumaiara iritsi berri direnei ongietorria emango diete gaur arratsaldean, udaletxean

2024/11/12

Zumaiako Udalak herrira iritsi berri diren guztiak gonbidatu ditu saiora, etxeetara bidalitako gutunaren bidez. Saioa 18:00etan izango da udaletxean.

Gaur arratsaldean, 18:00etan, ongietorri ekitaldia egingo dute udaletxean, herrira bizitzera etorri diren pertsona berri guztiei zuzenduta. Ekitaldi honek Zumaian bizi berri diren pertsonei harrera integrala eskaintzea du helburu, eta 2021-2022 urteetan herriko eragileekin eta hezkuntza komunitatearekin elkarlanean sortutako harrera protokoloa eta gida oinarri hartuta antolatzen da urtero.

Ekitaldian, Zumaiara iritsi berri direnentzat baliagarria izan daitezkeen gaiez ariko dira, Harrera Gida oinarri hartuta. Gidak, lehenik, herriaren kokapena eta euskararen garrantzia azaltzen ditu. Ondoren, erroldatzea, egoera legala, gizarte arreta, osasuna, etxebizitza eta enplegua lortzeko baliabideak eskaintzen dira. Halaber, hezkuntza aukera eta haur, gazte, eta adinekoentzako baliabideak, berdintasuna sustatzeko tresnak eta kultur eta kirol jarduerak ere aurkezten dira, Zumaia herri bizi eta inklusibo bat bihurtzeko helburuz. Gida online eskuratu daiteke, herrira iritsi berriek integratzeko informazio osoa izan dezaten.

> Zumaiako Harrera Gida

Ongietorri ekitaldi honen bidez, Zumaiako Udala herrira iritsi berri direnei Zumaian ondo bizi ahal izateko behar duten informazio osoa ematea eta integratzeko bideak erraztea du helburu. Gida bost hizkuntzatan eskuratu daiteke, eta online ere ikus daiteke.

Zumaiara iritsi berri direnei ongietorria emango diete gaur arratsaldean, udaletxean