Zumaiako Udalak bat egin du UEMAk abiatu duen "egin nirekin ere euskaraz!" kanpainarekin

Sustraiak beste herrialdeetan izanagatik gurean errotu diren hainbat euskaldunen eskaria da kanpaina, hasiera batean gainerako herritar batzuek euskara ukatzen dietela sumatuta. Euskarak kolore asko dituela eta, azalaren kolorea askotarikoa izan arren, herritar horiek guztiak euskaldunak direla gogoratu nahi du UEMAren kanpainak.

Euskaldunak dira Arlenys, Haider, Aimar, Aya, Nora, Sefora, Miruna, Randy, Ekhi, Manna, Anastasia, Andriy, Zunnurain, Lassana, Abdallah, Alaia, Rayan eta Leen, UEMAk egin duen Egin nirekin ere euskaraz! kanpainari aurpegia jarri dioten lagunak.

Senegalen, Dominikar Errepublikan, Saharan, Pakistanen, Ukrainan, Marokon, Ekuadorren eta Euskal Herrian jaio dira, besteak beste. Bizi, berriz, Ondarroan, Leitzan, Ibarran, Zestoan eta Zaldibian bizi dira, baina Zumaian eta gainerako udalerri euskaldunetan ere badira haiek bezalako neska-mutil asko, zorionez. Urdua, arabiera, mandinga, kitxua, ukrainera, gaztelania edota euskara jaso dute etxean. Euskara, zehazki, lehen hizkuntza da batzuentzat, bigarrena besteentzat, eta baita hirugarrena ere zenbaitentzat. Hala ere, euskaraz aritzen dira ikastetxean eta lagunartean.

Askotan, ordea, azalaren koloreagatik, aurreiritziengatik edota auskalo zergatik erdaraz hitz egiten diete herritar batzuek. Eta ez zaie gustatzen. Euskaldunak direlako. Kanpainako bideoetan adierazi duten moduan, "badakigulako euskara dela zubirik ederrena, eta euskara ukatzen diguten bakoitzean zubia ere ukatzen zaigulako". Horregatik, beraiekin ere euskaraz egiteko eskatu nahi izan diete gainerako herritarrei. "Euskara ukatzen digutenean, bertakoa izatea eta sentitzea ere ukatzen digute, nahi gabe izan arren".

Albiste erlazionatuak