Lankidetza hitzarmena sinatu du Udalak 'Oinherri' eta 'Haurren Hiria' sareekin

Zumaiako Udalak Oinherri herri hezitzaileen sarearekin eta Haurren Hiria sarerekin lankidetza hitzarmena sinatu du astearte honetan, Zumaia herri hezitzailea izan dadin pausoak emateko. 

Maddi Aldalur Hezkuntza zinegotziak azaldu duenez, haurrentzako eta haurrengandik sortutako herri bat izatea suposatzen du horrek, haurren kulturaren aitortzatik abiatuta. "Ikuspuntu horretatik sortutako herri batek herritar guztiontzako dakartza onurak". Halaber, herri hezitzaile hori balio hezitzaile batzuen gainean landu nahi dute (berdintasuna, aniztasuna, partehartzea, euskara...). Horrek guztiak "haurrak etorkizuneko herritar bezala ikusi beharrean, gaur egungo herritar bezala ikusi beharra dakar".

Aldalurrek datozen hilabeteetan Zumaian egingo duten lanketa ere aurreratu du. Lehen pausu moduan, herriko zenbait eragilerekin bilduko da Udala, diagnostiko bat osatzeko, eta "hezitzaileak izatearen kontzientzia" lantzeko. Gainera, aspalditik egitekoa zen eskola kirolaren inguruko hausnarketa abiatuko dute. Azkenik, etorkizunera begira haurren kontseilu bat sortzeko asmoa dutela azaldu du. Prozesu guzti horretan 'Oinherri' eta 'Haurren Hiria' sareak izango ditu bidelagun Zumaiako Udalak.

Iraileko ohiko osoko bilkuran aho batez onartu zen Udala bi sareotan sartzea.

Haurren ikuspegi apurtzailea

Gotzon Bernaolak, Haurren Hiria Sarearen ordezkariak, "herritarrek, eragileek eta instituzioek duten erantzukizun partekatua nabarmendu du. "Herri batean eta komunitateetan ikaskuntza baldintzatzen duten elementu ugariegonik, horiek guztiekiko erantzukizuna hartu beharra dago". Komunitate hezitzaileak elkarlanean sortzearen beharra ere aipatu du Bernaolak.

Era berean, haurrekin lan egitea erabaki politikoaren erdigunera eramateak ikuspegi "dibergente eta apurtzailea" eskaintzen digula adierazi du: "helduen erabakiak zalantzan jartzen dituen ikuspegi hori positiboa da herritar guztientzat". 

Herria, espazio hezitzailea

Maite Azpiazu Oinherri herri hezitzaileen sareko ordezkaria pozik agertu da Zumaiak Oinherri sarea indartuko duelako. Zumaiak sareko beste herriengandik jaso dezakeena ere interesgarria izango dela uste du, aholkularitza eta formazioa, besteak beste. 

Oinherrik ere hezkuntza ardura partekatu moduan ulertzen du, eta Udala, eskola eta herrigintzako eragileen arteko elkarlanak garrantzia izugarria duela uste du. Zentzu horretan, "familia eta eskolaz harago, herria bera espazio hezitzailea dela" ulertzea ezinbestekoa dela adierazi du Azpiazuk. Zentzu berean, helburua herritar zaurgarrienak erdigunean jarriz, komunitatetik, gobernantza eredu irekiagoak sortzea dela adierazi du.

Albiste erlazionatuak