Antzerki tailerra eskainiko dute asteartean Olatz Beobide, Nerea Arriola eta Maitane Perezek

Olatz Beobide, Nerea Arriola eta Maitane Perez aktore eta sortzaileak "euskalduntasunaren, erruaren, euskal identitatearen, eta euskal irriaren inguruko" antzezlan obra sortzen ari dira, Udalbiltzak bultzatutako Geuretik Sortuak proiektuaren barruan. Askotariko zumaiarren kontakizunak biltzen ari dira, eta, banakako elkarrizketez gain, taldekako saioak egiten ari dira. Emakumeon* Etxean egin zuten lehenengo saioa, eta Mari kalean bildu ziren beste hainbat herritarrekin joan den astean. Orain, astearte honetan, hilaren 27an, antzerki tailer formatuan egingo dute saioa, 18:00etatik 20:00etara Torreberrin.

Sormen egonaldia Zumaian, Geuretik Sortuak ekimenaren barruan

Hiru sortzaileak Zumaian daude egunotan, sormen egonaldian, eta zumaiarrekin eta bertako elkarteekin biltzen ari dira, haien kontakizunak oinarri hartuta, antzezlan bat sortzeko. Udalbiltzak bultzatutako ekimena da Geuretik Sortuak, eta, beste askoren artean, Zumaiako Udalak ere bultzatzen du dinamika hori, Euskal Herri mailan sormen prozesuak eta lanak sustatzeko.

Prozesu honetan "euskalduntasunari eta erruari buruz" hausnartu nahi dute, "euskal identitatearen eraikuntzan hartzen ditugun edo egokitzen zaizkigun motxila ezberdin guzti horiei buruz". Aldi berean euskal irria ere ezagutu nahi dugu, "geureaz eta gure artean umoreak laguntzen baikaitu korapiloak askatzen". Herrian dauden bitartean "jendearekin elkartu, kontakizunak eta istorioak entzun, sentsazioak bildu, eta herria eta bere pluraltasuna ezagutu" nahi dute.

Albiste erlazionatuak