Entzungai dago Migel Gutierrezek sortutako 'basoa.wav' EPa

Sormen bekaren bidez babestutako basoa.wav proiektuaren emaitza argitaratu du Migel Gutierrez musikari zumaiarrak. Musika elektronikoa oinarri, eta Zumaiako musikari eta sortzaileen ondoan, askotariko estiloak jorratu ditu. 

Herriko musikari andana elkartu ditu, besteak beste: Joxe Mari Azkue, Maria Zubimendi de la Hoz, Oihana Rodriguez eta Manu Aizpurua. Musika Bandarekin eta Korokoiarekin ere elkarlanean aritu da, eta, letragileak ere izan ditu ondoan: Maddi Gallastegi, Jon Maia eta Manu Aizpurua.

Gutierrezek, EPa sortzeaz gain, zenbat helburu zehaztu zituen proiektuan, hala nola: Zumaian musika elektronikoaren hedapena sustatzea, musikarien arteko sare berriak sortzea, eta musika sortu eta esperimentatzeko espazio berriak sortzea. Helburu horiek beteta pozik agertu da. Gainera, prozesu guztian zehar adin desberdinetako kideak aritu direla nabarmendu du, eta proiektuan parte hartu dutenen artean erdiak baino gehiago emakumeak direla; horrez gain, prozesua euskaraz garatu dute.

Deialdi honek agerian utzi du herriko sortzaileen arteko sinergiak sortzeko duen potentziala. Izan ere, herriko beste sortzaile batek, Iñaki Agirrezabalak, Migel Gutierrezen proiektuan sortutako baten abestiaren gainean sortu du bideoklipa, honek gazte ekimenak sustatzeko dirulaguntzarekin. Proiektu honetan ere herriko gazte ugari aritu dira lanean. Ikusi hemen bideoklipa:

Sormena babesteko

Sormen lanak babesteko helburuarekin sortu zuen Zumaiako Udalak beka berri hau, 2022an. Kultur sorkuntza bezala ulertzen dira artistaren imajinaziotik eratorritako edozein obra: literatura, antzerkia edo antzerki testuak, zinema eta ikus-entzunezkoak, dantza, arte plastikoak, eta bestelakoak. Proiektu zehatzak eta beharrezko sormen prozesua barnebiltzen ditu deialdiak. 

Zumaiako Udalaren ustetan halako bekek herriko sortzaileek beraien proiektuak sendotzeko oinarria eskaintzen dute, eta, horren balioaz jakitun, 2025ean ere beka deialdia argitaratu du. Hemen ikus daiteke deialdiari buruzko informazio guztia. Gazte ekimenak bultzatzeko dirulaguntzei deialdia ere martxan dago.

Albiste erlazionatuak