Berdintasunerako ordenantza jendaurrean erakusgai dago

Zumaiako Udalak 2009. urtean egin zuen emakume eta gizonen berdintasunari buruzko herri mailako lehen diagnostikoa, eta, ordutik, hainbat planen bidez gidatu ditu bere berdintasun politikak: 2010eko legegintzaldian onartu zen I. Plana, 2010-2014 bitarteko iraunaldia izan zuena, eta, horrekin batera, berdintasun teknikaria kontratatu zen lehen aldiz; ordutik beste hiru plan egon dira indarrean.

Hainbat arlo landu dira azken urteotan, udal langileen trebakuntza, inprimakietan sexu aldagaia txertatzea, dirulaguntzetan berdintasuna sustatzeko klausulak txertatzea, hizkuntza ez-sexistarako irizpideak lantzea, edota ordezkaritza orekatua bultzatzea, besteak beste. Plan horiek ahalbidetu dute estrategia integral baten baitan kokatzea berdintasun politikak, eta berdintasunaren eremuan egin beharreko esku-hartzea modu planifikatuagoan garatzea. Urte hauetan guztietan, Berdintasun Sailaren bultzada izan du gaiak eta Planaren jarraipena egin du berdintasun teknikariak. Nabarmentzeko da, halaber, Zumaiako Emakumeon* Etxearen sorreran, plan desberdinetan jasotako helburuak lantzeko erabat baliagarria izaten ari dena.

Orain arteko ibilbidea positiboki baloratuta, eta genero ikuspegiaren zeharkakotasunean sakontzeko asmotan, prozedurak langileekin batera hobetu eta hobeto zehaztuta, eta oinarri juridiko sendoagoak jartzeko helburuarekin, Berdintasunerako Udal Ordenantza onartu nahi du Zumaiako udalbatzak.

Ordenantza jendaurreko agerraldian dago dagoeneko, eta herritarrek maiatzaren 31ra arteko epea izango dute testuari ekarpenak egiteko. Ekarpenak jaso eta aztertu ondotik, Udal Gobernuaren asmoa da urtea amaitu aurretik onartzea.

> Emakume eta gizonen berdintasunerako ordenantza arautzaile berria onartu aurreko kontsulta publikoa

Albiste erlazionatuak