Gizontasunaren inguruko hausnarketa tailerrak izango dira urritik abendura bitartean

2024/08/29

Gizontasun eredu hegemonikoaren inguruan hausnartzeko eta eredu askatzaileagoak esploratzeko bost saioko tailer teoriko-praktikoa izango da. Asteartetan egingo dituzte saioak, hamabostean behin, 18:00etatik 20:00etara bitartean.

Zumaiako Udalak gizonei zuzendutako bost saioko tailer teoriko-praktikoa eskainiko du ikasturte berri honetan. Hiruki Larroxa kolektiboko Ibai Fresnedok gidatuko ditu saioak.

Tailerraren helburu nagusia da gaur egungo gizontasun ereduen inguruko gogoeta sakona bultzatzea, norberak gizontasun eredu nagusiaren inguruan eraiki duen identitateaz jabetzearekin batera. Indarkeria matxista eta sexu indarkeria, pribilegioak eta botere harremanak, sexualitatea eta desira, zaintza, gurasotasuna, eta gizontasun eredu askatzaileak izango dituzte hizpide, besteak beste. Halaber, diskurtso feministak eta emozioen kudeaketa aztertuko dituzte.

Izen-ematea

Saio hauek Zumaiako gizon guztiei zuzenduta daude. Doakoa da, eta parte hartu nahi dutenek mezua bidali beharko dute berdintasuna@zumaia.eus e-mailera. Urriaren 4a izango da izena emateko azken eguna. Saioetako hizkuntza trataera partaideen arabera zehaztuko dute.

Zalantzak edukitzekotan Berdintasun Sailarekin harremanetan jartzera gonbidatu dituzte herritarrak; horretarako ere berdintasuna@zumaia.eus e-mailera idatzi dezakete.

Gizontasunaren inguruko hausnarketa tailerrak izango dira urritik abendura bitartean