Irailaren 2an zabalduko da kiroldegiko ikastaroetan izena emateko epea

2019/08/19

Lehorreko nahiz uretako ikastaroak antolatu dituzte kiroldegiko arduradunek. Ikastaroak astelehenetik ostiralera eskainiko dira goizez zein arratsaldez eta adin guztietako zumaiarrek, bazkideek eta bazkide ez direnek ere parte hartu ahal izango dute.

Iazko eskaintzarekin alderatuz, hainbat jarduera indartu egin dira. TRX ikastaroak arrakasta handia izan zuen pasa den sasoian, eta ordutegi aukera zabalagoa jarri dute inor kanpoan geratu ez dadin. Lehorreko aukerekin jarraituz, jada ohikoak bilakatu diren ikastaroak daude: GAP, Zumba, Total Training, Cycling eta Pilates.

Igeriketan ere badira  berrikuntzak: antxoa eta aingira taldeek klaseak ostiraletan jasotzeko aukera izango dute. Izena emateko orduan zehaztu beharko da zein egunetan gauzatu nahi den jarduera. Horrez gain, helduentzako hastapeneko, hobekuntzako nahiz erdi mailako ikastaroak aurkitu daitezke zerrendan.

Irailaren 30ean hasiko dira 2019/2020 ikasturteko ikastaroak abian. Irailean zehar udako jarduerak egongo dira, eta horietan izena emateko aukera zabalik dago oraindik.

Irailaren 2an zabalduko da kiroldegiko ikastaroetan izena emateko epea