IV. Berdintasun Plana osatzeko kontraste saioa izango da urriaren 24an

Zumaiako Udala IV. Berdintasun Plana osatzeko lanetan murgilduta dago du 2022an. Helburua da plan berria urtea amaitu baino lehenago onartzea, 2023arekin batera indarrean jartzeko. Herritarren esperientziak jasota, eta mugimendu eta elkarteen iritziak kontutan hartuta osatu nahi dute plan berria.

Martxotik ekainera bitartean egungo egoeraren argazkia egiten aritu dira (udal barrura eta herrira begiratuz); ikasturte berrian, berriz, egindako balorazioa eta identifikatutako erronketatik abiatuta, helburuak eta neurriak lantzen ari diradituzte, horiek guztiak IV. Berdintasun Planean txertatuz.

Plana errealista, gertukoa eta eraginkorra izatea nahi dute, udaleko eta udalerriko beharretara egokitua. Horretarako, Plana diseinatzeko herritarren ekarpena ezinbestekoa dela uste du Udalak. Herritarrentzako saio irekiak antolatu dituzte, eta Berdintasun Foroko, Emakumeon* Etxeko, mugimendu feministako, eta kolektiko konkretuetako kideekin elkarlana bermatzeko, taldekako elkarrizketak eta saio bereziak egin dituzte. Udal langileak eta ordezkari politikoak ere planaren osaketan parte hartzen ari dira.

Azken hilabeteotan jasotako ekarpenak eta egindako lana bilduta, urriaren 24ko saioan kontraste ariketa egingo dute herritarrekin. Zumaiako Udalak datozen lau urteetan aurrera eramango dituen berdintasun politikak partekatu eta adostea dute helburu.

Urteetako lana

Zumaiako Udalak urteak daramatza emakumeen eta gizonen arteko berdintasuna sustatzen, eta horren ondorio dira diseinatu eta garatu diren berdintasunerako hiru planak zein martxan jarritako politika konkretuak.

2010ean onartu zen I. Berdintasun Plana, eta hamar urte baino gehiago igaro dira ordutik. Urte hauetan aldaketa asko egon dira herrian, eta azken urtean bertan “bi aldaketa handi” izan dira: Emakumeon* Etxearen sorrera eta pandemia egoerak eragindako aldaketak. Hori horrela izanik, geldialdia egin, eta, azken urteetan egindako lana baloratu eta egoera berrira egokituko den plan berri bat diseinatu nahi du Udalak. Plan berria izango da datozen urteetan berdintasunaren alorrean egin beharreko esku-hartzea planifikatzeko eta antolatzeko tresna nagusia.

Albiste erlazionatuak