Herrialde Katalanetatik Zumaiara bisita, 'ekosistema kooperatiboa sortzeko hasita bidea' ezagutzeko

Ekonomia Sozial Eraldatzailearen inguruko Euskal Herriko hainbat ekimen ezagutu dituzte egunotan Herrialde Katalanetatik etorritako hainbat kidek. Proiektu eta sare kooperatiboetan lanean ari dira horietako batzuk, eta Ekonomia Sozial eta Eraldatzailearen inguruko graduondoko ikasleak dira beste batzuk. Olatukoop sarearen eskutik etorri dira Euskal Herrira, eta Zumaian pasa zuten larunbat arratsaldea. 

Zumaian zenbait elkarteko kidek eta ordezkari politikoek egin zieten harrera, eta herrian sortzen ari den "ekosistema kooperatiboa" aurkeztu zieten. Zumaiako Udalak eta Olatukoop sareak elkarlanean antolatutako ZKOOP proiektuaren azalpenarekin hasi zuten bisita. Ekonomia sozial eta eraldatzailearen inguruko formakuntza jaso zuten hainbat herritar eta ordezkarik 2022an zehar. Jarraian, bi proiektu kooperatibori bidelaguntza eman zieten Olatukoop-eko kideek, eta, modu paraleloan, Alberga elkartea sortu zuten formakuntzan parte hartu zuten hainbat kidek. Udalak eta Alberga elkarteak coworking edo elkarlangunea sortu nahi dute Hogarrean, ekonomia soziala oinarri duten proiektuei espazio bat eskaintzeko.

Asmo eta proiektu gehiagoz ere aritu ziren: Erkibe eraikinean Azpeitiko elikagunearen antzeko proiektu bat sortzeko proiektua eta Beheko plaza tokiko ekonomiaren topaleku bihurtzeko asmoa, Zuntz Optikoa Zumaia proiektua, zaintza lanen inguruko lanketak, edota energia komunitateak bultzatzeko lanak. Gainera, administrazio publikoen eta elkarte zein kooperatiben arteko harreman eta kudeaketa-eredu berriak martxan jartzeko beharraz aritu ziren. 

Albiste erlazionatuak