Kontsumo ohituren inguruan galdetuko die Udalak herritarrei

Zumaiako Udalak, merkataritza sektorera bideraturiko proiektuen artean, Plangintza Estrategiko bat garatuko du hurrengo hilabeteetan. Azken helburua da herriko merkataritzaren egoera hobetzera biderturiko ekintza posibleak identifikatzea, denboran zehar merkatarien lehiakortasuna hobetzen joan dadin. Lehendabiziko pauso moduan, egungo egoeraren diagnosia egingo dute: Zumaiako merkataritza eskaria eta eskaintza aztertuko dituzte, baita herriko merkataritzaren ezaugarriak ere (auzokako eskaintza, turismoaren eragina eta fluxuen kaptazioa, besteak beste).

Horretarako, datozen asteetan kale-inkestak egingo zaizkie herritarrei, haien kontsumo-ohiturak eta Zumaiako merkataritza-eskaintzaren balorazioa ezagutzeko. Aldi berean, telefono deiak ere egingo dira galdetegia erantzuteko eskatuz. Erantzunak erabat anonimoak izango dira eta diagnosia osatzeko soilik erabiliko dira. Gainera, herritarrek zein merkatariek galdetegia internet bidez betetzeko aukera ere izango dute.

> Herritarrei zuzendutako galdetegia

> Merkatariei zuzendutako galdetegia

Azterketa osatzeko, herriko merkatariak ere elkarrizketatuko dituzte, euren beharrak ezagutzeko ideiarekin. Gainera, nola ez, Gertu Zumaiako Merkatari eta Ostalari Elkartearen iritzia ere jasoko da, baita merkataritzarekin lotura izan dezaketen beste hainbat eragilerena ere.

Jasotako informazioarekin Zumaiako merkataritzaren argazkia egin eta hobekuntzarako ekintzak proposatuko dira, sektorearen etorkizuna zehaztuko dutenak. Horrenbestez, Zumaiako Udalak parte hartzera gonbidatu nahi ditu herritarrak, horien ekarpenari esker azterketa ahalik eta errealistena izan dadin.

Albiste erlazionatuak