Zumaiako Udalak hitzarmena sinatu berri du Garabide elkartearekin. Iñaki Ostolaza Zumaiako alkateak eta Iñaki Martinez Garabide elkarteko lehendakariak sinatu dute hitzarmena udaletxean.

Garabide Elkarteak 2005 urtetik darama garapenerako euskal lankidetzaren baitan kooperazio ildo berri bat lantzen: hizkuntza lankidetza. Hau da, hegoaldeko herrietan hizkuntza biziberritzeko egitasmoak sustatzen, honako helburu hauekin:

1. Hegoko herrietako hizkuntza komunitate minorizatuekin lankidetza bideratzea, euskara eta euskal kulturaren garapen esperientzien trukean oinarrituta.
2. Norabide horretan, munduko hizkuntza komunitate minorizatuetako eragileekin lankidetza proiektuak garatzea. Lankidetza proiektu horiek hizkuntzaren, kulturaren eta nortasunaren garapen-alorretan gauzatzen dira, hezkuntzaren alorrean indar berezia jarriz, garapena integrala izan dadin ezinbestekoak baitira.
3. Euskararen eta euskal kulturaren garapenean lanean ari diren erakunde eta eragileek Hegoaldeko hizkuntza komunitate minorizatuekiko lankidetzarako beren esperientzia eskain dezaten sustatzea, horretarako markoa, bideak eta espazioak eskainiz.

Zumaiako Udalak, bere aldetik, egoki ikusi du kooperazio lan ildo honetan sakontzea, Garabide Elkartearekin batera, hegoaldeko herrietan hizkuntza normalizatzeko egitasmoak sustatzen jarraitzeko. Hori horrela izanik, 5.000 euroko dirulaguntza emango dio elkarteari.

Albiste erlazionatuak