Geoparkearen ebaluazio misioko ordezkaritza Zumaian izan da gaur

Bisitaren helburua da Geoparkearen azken lau urteotako kudeaketa eta eman diren aurrerapausoen azterketa sakona egitea UNESCOren Munduko Geoparke izateko baldintzak betetzen dituela ziurtatzeko. Lau egunez ebaluatzaileak erakundeetako ordezkariekin, teknikariekin eta inguruko eragile ezberdinekin elkartuko dira eta Geoparkeko interesgune nagusiak bisitatuko dituzte.

Azken egunotan Deba eta Mutriku bisitatu ondotik, Zumaian izan dira gaur bi ebaluatzaileak. Algorri Interpretazio Zentroa bisitatu dute lehenengo, eta bertan bildutako materiala ezagutzeaz gain, hezkuntza proiektuaren berri izateko aukera izan dute. Jarraian, San Telmo kofradia bisitatu dute, eta, ondoren, Zumaiako flyscha bertatik bertara ezagutzeko aukera izan dute: Itzurunen izan dira lehenengo, eta Algorri inguruan beranduago.

Euskal Kostaldeko Geoparkea 2010az geroztik da UNESCOren Munduko eta Europako Geoparkeen Sareko kidea. UNESCOren Munduko Geoparkeek izendapen hau lau urterako eskuratzen dute eta, epe hau igarota, berriro aztertzen da Geoparkearen funtzionamendua eta kalitatea, errebalida prozesu zorrotz baten bitartez. Azterketaren emaitza uda ostean emango dute ezagutzera.

Albiste erlazionatuak