Algorriko ibilbidean hezitzaile bat egongo da uztailean eta abuztuan, gune horren babesa sustatzeko

2023/07/12

Zumaiako Udalak, Gipuzkoa Foru Aldundiak eta Geoparkeak elkarlanean adostutako ekintza da. Hezitzaileen lana izango da bisitariei Paisaia Natura Babestuaren segurtasun eta kontserbazio arauak bete ditzaten informazioa ematea.

Uztailean eta abuztuan, jende gehien pilatzen den egun eta momentuetan, hezitzaile bat egongo da Algorriko ibilbidean. Hezitzailearen lana segurtasun eta kontserbazio arauak bete daitezen informazioa ematea izango da. Modu honetan, eremu horretan bisitari gehien dauden momentuetan, ibilbidea errespetatzeko eta pertsonen segurtasuna bermatzeko arretaz aritu daitezen sustatuko dute.

Zehazki uztaileko asteburu eta jaiegunetan, eta, abuztuan zehar, hilaren 1etik 20ra bitartean egunero egongo da hezitzaile bat ibilbidean. 11:00etatik 14:00etara eta 17:00etatik 19:00etara egingo dituzte txandak, eta Geoparkeko txalekoarekin identifikatuta egongo dira. Aste Santuetako oporretan egin zuten lehenengo proba, eta balorazioa positiboa izanik, udaran zehar ere errepikatu egingo dute neurria. 

Jakina denez, Algorriko ibiltokia Deba-Zumaia itsasertzeko Paisaia Natural Babestuaren parte da —0404/LI/2021 Foru Aginduak erregulatzen du babesa—. Hori horrela izanik, eremu horrekiko ardura duten hiru instituzioek (Zumaiako Udalak, Gipuzkoako Foru Aldundiak eta Geoparkeak) babesa bermatzeko neurri bateratu hau martxan jartzea erabaki dute.

Algorriko ibilbidean hezitzaile bat egongo da uztailean eta abuztuan, gune horren babesa sustatzeko