Zabalik dago Moilaberri eraikina birgaitzeko lizitazio prozesua

Zumaiako Udalak Moilaberri eraikinaren birgaitze jasangarri eta integrala martxan jartzeko beharrezkoak diren obrak kontratatzeko espedientea onartu eta lizitazioa ireki du. Birgaitze hau Europar Batasunaren NextGenerationEU funtsek kofinantzatuko dute, Suspertze, Transformazio eta Erresilientzia Planaren baitan. Moilaberri eraikina Zumaia eta Geoparkea ezagutzeko ate bihurtu nahi dute [informazio gehiago beherago].

Proiektuaren aurrekontua 1.060.010 eurokoa da (BEZ barne), eta kostuaren %47 (494.095 euro) Europar Batasunak finantzatuko du, Next Generation funtsen barruan. Gainerako %53 Zumaiako Udalak hartuko du bere gain, 565.915 euroko ekarpenarekin.

Birgaitzearen helburua eraikinaren eraginkortasun energetikoa hobetzea eta ingurumen-irizpide zorrotzak betetzea da, energia aurrezpen primarioaren %30 lortuz. Obrak gauzatzeko epea 12 hilabetekoa izango da, eta kontratazio-prozesua prozedura ireki eta erraztuaren bidez egingo da. Eskaintzak aurkezteko epea abenduaren 11n amaituko da, 15:00etan. Dokumentazioa eta baldintzak Zumaiako Udalaren kontratugilearen profilean kontsulta daitezke.

> Kontratatzailearen profila

Geltokia izandakoa, Zumaia eta Geoparke osoa ezagutzeko atea

Moilaberri eraikina, tren geltokia izandako eraikin historikoa, Zumaia eta Geoparkea ezagutzeko ate bihurtuko da. Ate horretatik Geoparkearen eremu geografiko osora eta askotariko intereslekuetara bideratu nahi dituzte bisitariak.

Birgaitzearen asmo nagusietako bat da eraikina herritarrei eta bisitariei irekitako gune publiko gisa berreskuratzea. Harrera guneaz gain, erakusketa edo interpretazio-guneak izango ditu eraikinak, baita lanerako bulegoak eta erabilera anitzetarako espazio bat ere. 

Horiek horrela, Moilaberri eraikina turismo bulego soil bat baino gehiago izatea nahiko lukete Zumaiako Udalak. Geoparkerako sarbidea izatearekin batera,  bisitari eta turistak Geoparkearen eremu osoan ahalik eta modu orekatuenean mugitzea bilatzen du proiektuak, bisitariak Geoparkearen eremu osoak barnebiltzen dituen askotariko interes-lekuetara bideratzeko.

Izan ere, geologia, paisaia eta natura balio handiko baliabidez gain, ingurune horretan sortutako eta garatutako kultur balioek osatzen dute Geoparkea: artea, tradizioa, ohiturak, gastronomia, musika, landa-eremua, etab. Estrategia horrekin ingurumen-inpaktua murriztu eta lurraldearen oreka indartzeko bideak jarri nahi dituzte Zumaiako Udalak eta Geoparkeak.

Zentzu berean, eraikin berri honetan, bestelako elementuetan ere jarriko dute indarra. Hala nola, Zumaiako Industria Ondarearen Informazio Zentroak (ZIIZ) bere leku propioa izango du Moilaberrin, tokiko industria ondarearen balioan azpimarra egiteko. Gainera, euskara ere elementu garrantzitsua izango da espazio berrian.

Albiste erlazionatuak