Iñaki Beobide Agirrezabalaga, gugan bego

2024/01/16

Zumaiako Udalak bere doluminak adierazi nahi dizkie igandean zendu zen Iñaki Beobide Agirrezabalagaren senide eta lagunei. Beobide euskararen eta kulturgintzaren sustatzaile garrantzitsua izan da urte guztiotan, eta Udalak bere esker ona adierazi nahi du honek egindako lanagatik. Gugan bego.

Iñaki Beobide Agirrezabalaga (Zumaia, 1934-Donostia, 2024) Herri Gogoa diskoetxeko eta Jarrai antzerki taldeko sortzaile izan zen. Bizitza guztia eman zuen euskal kulturgintzari emana, eta igandean hil zen, 89 urte zituela. Euskal Kantagintza Berriaren hainbat disko grabatu zituen Donostiako estudioan, eta Jarrai antzerki taldean atzerriko antzerkigileen obrak euskaratu eta taularatu zituen. Ikuska liburu saila ere sortu zuen, eta ETBren sorreran parte hartu zuen. 

Kulturgilea eta kultura-eragilea izan zen Beobide, hamaika egitasmoren parte. Frankismoak gogor kolpatutako etxe batean hazi zen, eta zentsura ere ezagutu zuen diskogintzan hasitakoan. Soldadutza egin bitarteko urteetan Zumaiari lotua bizi izan zen arren, geroztik Donostian izan zuen bizitokia eta era guztietako kultur ekintzak antolatzeko gunea.

JAKIN aldizkarian elkarrizketa egin zioten 2004an, eta, besteak beste, Zumaiako kontuak aipatu zituen bertan; hemen irakur daiteke. Oargi kultura erakundean parte hartu zuen 50eko hamarkadan, eta batez ere antzezlan batzuk egin zituen, euskaraz eta gaztelaniaz, luistarrek Erribera kalean zeukaten zentroan. Abelin Linazisorok ere goraipatu zuen Iñaki Beobidek egindako lana 2007an ahotsak.eus gunean egindako elkarrizketan, Gipuzkoako herri askotan 60ko hamarkadan izan zuen eragina azpimarratuta.

Zumaiako Udalak bere doluminak adierazi nahi dizkie Beobideren senide eta lagunei, eta eskerrak eman urteetan honek egindako lanagatik.

Gugan bego.

Iñaki Beobide Agirrezabalaga, gugan bego