Zumaiak, Getariak eta Azpeitiak Udaltzaingoen Lan Eskaintza Publiko bateratua egingo dute, ‘konfiantza eta gertutasuna oinarri dituzten udaltzainak’ kontratatzeko

Zumaiako, Getariako eta Azpeitiko udalek Udaltzaingoen Lan Eskaintza Publiko bateratua abiatuko dute, herritarren beharretara egokitutako udaltzaingo eredu hurbila eta komunitarioa indartzeko. Hori horrela, gertutasuna eta komunitatearekiko inplikazioa izango dira lanpostu hauetan funtsezko ezaugarriak. Horregatik, hautaketa prozesuan herriaren ezagutza eta euskararen erabilera bereziki baloratuko dituzte. Hala adierazi du Iñaki Ostolaza Zumaiako alkateak, gaur goizean beste bi herriotako alkateekin batera Zumaiako udaltzaingoan egindako agerraldian.

Udalerri bakoitzak bere identitatea eta kultura propioak ditu, eta udaltzainek herritarrenganako gertutasuna eta elkarrizketa sustatzeko gaitasuna izan behar dutela ulertzen dute hiru udalotako alkateek. "Euskaraz komunikatzeko gaitasuna ezinbestekoa da, baita herriaren ezaugarriak eta kultura ezagutzea ere, herritarren eguneroko bizitzan parte hartzeko eta gatazkak kudeatzeko tresna gisa", nabarmendu du Haritz Alberdi Getariako alkateak.

Guztira, hiru herriotan aritzeko 5 udaltzain postu eskainiko dituzte: hiru Zumaiara, bat Getariarako eta bat Azpeitirako. Edonola ere, prozesuan zehar kontratatu beharreko udaltzain kopurua handitzea aurreikusita dago. Nagore Alkorta Azpeitiko alkateak zehaztu duenez, Azpeitiaren kasuan, barne promozio bitartez lau Agente Lehen postu beteko dituzte; ondorioz, prozesu honetara lau udaltzain postu gehitzea espero da. Gainera, lanpostu horiek betetzeaz gain, prozesutik lan-poltsa eratuko dute, hiru herriotan aurrerantzean egon daitezkeen beharrei erantzuteko.

Herritarren bizikidetza hobetzeko bitarteko eraginkorrenak prebentzioa, informazioa eta bitartekaritza direla ulertuta, gatazken kudeaketarako gertutasuna eta komunikazioa ezinbestekotzat dituzte. Segurtasun eredu zentralizatu eta zigortzailetik urrundu, eta gertuko udaltzain eredu batera bidean pausoak ematen jarraitu nahi dutela azaldu du Iñaki Ostolazak. "Udaltzaingo eredu honek herritarrekin elkarlanean arituko diren profesionalak bilatzen ditu, herri bakoitzaren ezaugarriak eta herritarren askotariko beharrak ulertzeko eta horiei erantzuteko gai izango direnak", adierazi du. Nagore Alkortaren esanetan, badira urtean bestelako udaltzaingo eredu baten bidean pausoak ematen hasi zirela, hala nola, bitartekaritza indartuz edota euskara zein jazarpen sexistaren arloko formazio saioakemanez; prozesu honekin, pauso berri bat eman nahi dute.

Halaber, prozesu hau abiatzearen beste arrazoi bat da herriotako udaltzaingoen plantilletan egonkortasuna bilatzea. Izan ere, esperientziak erakutsi du Arkauteko prozesuen bidez hautatutako udaltzainek, askotan, berehala uko egiten diotela plazari, beste herri edo hiriburuetara joateko. Hori saihesteko, herriotan lan egin nahi duten udaltzainak bilatzen ditu prozesu honek. 

Hautaketa prozesuaren nondik norakoak

Udaltzaingoen Lan Eskaintza Publiko bateratua kudeatzearen arduraduna Zumaiako Udala izango da. Getariako eta Azpeitiko udalek Zumaiako Udalaren esku utzi dute prozesuaren gaineko eskumena, osoko bilkuretan hala onartuta. Otsaileko udalbatzan, prozesu bateratuaren ardura Zumaiako Udalak bere gain hartzea eztabaidatuko dute. Hori eginda, aurreikuspenen arabera, martxoan zehar zabalduko dute deialdia. 

Lehenago adierazi moduan, guztira, hiru herriotan aritzeko 5 udaltzain postu eskainiko dituzte hasiera batean: hiru Zumaiara, bat Getariarako eta bat Azpeitirako. Edonola ere, prozesuan zehar kontratatu beharreko udaltzain kopurua handitzea aurreikusita dago. Azpeitiaren kasuan, adibidez, barne promozio bitartez lau Agente Lehen postu beteko dituzte; ondorioz, prozesu honetara lau udaltzain postu gehitzea espero da. Gainera, lanpostu horiek betetzeaz gain, prozesutik lan-poltsa eratuko dute, hiru herriotan aurrerantzean egon daitezkeen beharrei erantzuteko.

Albiste erlazionatuak